Jean-Rémi Chareyre 29/10/2017

Sigurvegarinn, það er ég!

Jæja, nú keppast álitsgjafar um að dæma um hver sé helsti sigurvegari kosninganna. Sumir segja það vera Miðflokkurinn, aðrir Flokkur Fólksins, enn aðrir Samfylkingin.

Þetta er allt saman tóm vitleysa: sigurvegarinn, það er ég!

 

Tveimur vikum fyrir kosningar birti ég kosningaspá mína. Þá voru vinstri flokkarnir að mælast með 49,5% en hægri flokkarnir með 48,7%. Margir töluðu um „vinstri sveiflu“ og dundu sér við að mynda hina fullkomnu vinstri stjórn. Meira að segja Bjarni Ben sjálfur var farinn að veifa vinstri-grýlunni. Ekki seinna en í gær birti Vísir frétt undir titilinn: „vinstri stjórn í kortunum„.

Ég spáði hins vegar stórsigur hægrisins og sá fyrir mér að hægri flokkarnir myndu enda með 60% fylgi. Þessi pistill minn vakti litla kátínu hjá vinstri-meðbræðrum mínum og „like“-uppskeran var afskaplega fátækleg. Ég ljái þeim það ekki. Öll þurfum við að dreyma til að lifa af í þessum miskunarlausa heimi.

En hvað ætli hægri flokkarnir hafi fengið mikið fylgi í kosningunum?
D 25,25% + B 10,71% + M 10,87% + C 6,69% + F 6,88% = 60,4%

60,4%. Ég vanmat fylgi hægri flokkana um 0,4%. Ég gerði reyndar ekki ráð fyrir að Inga Sæland myndi fara að skæla í beinni útsendingu, svona korter í kosningar. Það gæti hafa skekkt útreikningana mína um þessa 0,4%.

En sem sagt: stjórnmálafræðingar og óbreyttir álitsgjafar voru úti á túni, á meðan ég spáði af yfirnáttúrulegri nákvæmni. Þess vegna krefst ég að vera ráðinn umsvifalaust í stöðu Sérstaks Stjórnmálalegs Spámanns hjá Fréttastofu Ríkisútvarpsins.

Ef einhverjir eru enn ekki sannfærðir um ágæti spádóma mína, þá ætla ég að leggja allt undir með því að birta spá mína um ríkisstjórnarmyndun. Þetta er reyndar bara endurtekning á fyrri spá minni, en þar skrifaði ég:

„Bjarni verður áfram forsætisráðherra, Sigmundur Davíð fær sína uppreist æru og lukkuriddararnir í Flokki Fólksins verða látnir fljóta með.“

Sjálfstæðisflokkurinn og Framsóknarflokkurinn verða kjarninn í ríkisstjórninni. Það sem er pínu snúið að spá fyrir um, er hvorn af hinum hægri flokkunum þeir munu taka með sér: Miðflokkinn, Viðreisn eða Flokk Fólksins. Það er ljóst að Sigurður Ingi og Sigmundur Davíð eru ekki búnir að grafa stríðsöxina: það gneistaði á milli þeirra í sjónvarpsviðtölum eftir kosningar. Það verður þó ekki hægt að mynda hægri stjórn án aðkomu Framsóknarflokksins (upp á þingmeirihluta), og hægri stjórn án Miðflokksins (BDCF) næði aðeins eins-manns meirihluta. Það er líka ólíklegt að Viðreisnarmenn treysti sér í slíkan félagsskap.

Það er miklu líklegra að Sigmundur og Sigurður Ingi taki nokkra snúninga og lýsi síðan yfir að þeir verði að „axla ábyrgð“ eins og það er kallað. Þar sem Viðreisnarmenn hafa lítið erindi í slíkt samstarf er langlíklegast að Flokkur Fólksins verði fenginn með til þess að mynda meirihluta, enda er Inga Sæland löngu hætt að gráta bága stöðu aldraðra og öryrkja, þvert á móti brosir hún út að eyrun, og segist elska alla og vera til í hvað sem er.

BDFM-ríkisstjórn væri með styrkan þingmeirihluta (35 þingmenn á móti 28), þar væru allir gallharðir ESB-andstæðingar komnir saman í einn pott og lítið mál fyrir þá að sameinast um, að gera ekki neitt sem einhverju máli skiptir, fyrir utan nokkrar sjónhverfingar. Af þessum 35 þingmönnum verða 24 karlmenn, svo konurnar geti lagað kaffi á meðan, og allir þeirra verða „sannir íslendingar“: Pawel Bartoszek og Nichole Leigh Mosty eru bæði dottin út af þingi svo að við ættum að losna við óþarft útlendingadaður. Guði sé lof.

Og ekki spillir fyrir að Ásmundur Friðriksson, Brynjar Nielsson og Sigríður Andersen fá að vera með.

Þetta verður sannkölluð veisla…

Flokkun : Pistlar
0,445