trusted online casino malaysia
Gestastofa 18/03/2019

Bakteríur sem þrífast á lyfjunum

Við erum að borga vexti þegar við kaupum kjöt. Innlenda matvöru.

Við erum að borga topp vexti. Svo búum við við gengi. Við eigum líka ansi magnað flækjustig og tilhneigingu til að bæta í það.

Hér ætla ég að setja launatölur úr orkustjórninni og toppurinn er að sjálfsögðu Landsvirkjun með 3,3 milljónir á mánuði. Svo kemur þarna Landsnet með 2,5 og Orkubú Vestfjarða með 1,8 og Rarik með 1,75, Orkusalan með 1,65.

Mér sýnast þetta vera 11 milljónir sem verið er að borga á mánuði til forstjóra raforkugeirans. Þetta er svo langt frá því að vera sniðugt að það hálfa væri nóg. Það bókstaflega þjónar ekki öðrum tilgangi en heimskunni að hafa alla þessa forstjóra yfir þessum örrekstri og svo því afli sem aðalega birtist okkur í gervi Sjálfstæðisflokksins þótt mér finnist alltaf brýnna og brýnna að við gerum okkur grein fyrir að það er þarna fólk sem stendur gjörsamlega á sama hvað flokkar heita eða blaðra, það ætlar að draga til sín alla hluti. 

Það er svo nokkurt mál að draga upp þá mynd sem snýr að dreifbýlinu og þá auðvitað bændum í orkumálum, ef frá eru taldir þeir sem eru sjálfum sér nógir, með virkjun og „alles“.

Það er hægt að lista þetta upp, en ég geri það ekki núna. Núna eru bændur heilt yfir rukkaðir fyrir að búa utan þéttbýlis vegna þess að það sé dýrara að koma til þeirra orkunni.

Auðvitað er margt að í framkvæmd búskaparins og vinnslunni, já, og markaðssetningunni líka, en með vaxandi vitund um tilvist okkar lærist okkur vonandi að við eigum að borða allt, ekki bara sumt, og þá er t.d. kindakjöt ódýr og góður matur að ég tali nú ekki um allar aukaafurðirnar.

Auðvitað hafa forystumenn landbúnaðarins klúðrað „öllu“ í gegnum tíðina og tískan hefur leikið okkur grátt. Ég get vel ímyndað mér að val okkar á því sem við ætlum að leggja okkur til munns eigi sér enga skynsamlega skýringu. Við getum hesthúsað hreindýrakjöti af hundgömlu en ekki veturgömlu fé. Margra ára heilagfiski, öðru nafni stórlúða, er, ef fáanleg, í svimandi háu verði.

Sýklalyfjaónæmi er ekkert grín og verður kannski til í tvennu lagi, annars vegar eru það bakteríur sem næstum að segja gætu þrifist á fúkkalyfjum, hins vegar borðum við þau býsn af þessu að þau hætta að gera okkur gagn og fáum jafnvel ofnæmi fyrir þeim. Hvað það varðar hljótum við að spyrja hvort það verði ekki bara arfbundið, alla vega þegar við höfum komið okkur því upp er ekki óskað eftir blóði úr okkur til heilsubótar fyrir annað fólk. Þarna er alveg ljóst að ekki gera allir sér grein fyrir því að þeir eru komnir með ofnæmi og halda áfram að gefa.

Nú held ég auðvitað að meiningin hafi verið að láta „sýklalyfjaónæmi“ bara ná yfir þessar bakteríur sem voru búnar að mynda þol fyrir lyfjunum og eru að sögn kunnugra stærsta ógnin, en það er ljóst að hvoru tveggja er undir ef við innbyrðum mikið af fúkkalyfjum og slatta af bakteríum sem vilja ekki lengur hafa neitt með þessi lyf að gera. Við getum sagt að hvoru tveggja sé t.d. í boði í hráu kjöti. Já, dýraafurðum yfirleitt.

Ljóst er að margir spila í lottóum og einhverjir hafa gaman af rússneskri rúllettu. Umferðin er gott dæmi um það síðarnefnda. En mér finnst það nokkuð langt gengið þegar sú rússneska er ekki spiluð með einu skoti í magasíninu, heldur bara einu auðu bili.

Nú geri ég mér grein fyrir að það verða ekki margir sem vilja til lengdar lifa á meintum „nautalundum“, ef ekki af því að borga of mikið eða fá leið á trakteringunum, þá vegna þess að frekar fyrr en síðar gerir einhver tilraun til að selja eitthvað sem ekki stendur undir væntingum og þá er sjálfhætt. En að lagt skuli í þennan feril til að prófa þetta núna og þrátt fyrir öll vísindi og alla söguna færir manni heim sanninn um að eitthvað verulegt sé að.

Ég veit að ég er að draga þetta mikið saman þegar ég segi að þegar við kaupum kindakjöt í dag séum við að borga vexti og geymslugjald, en líka kostnaðinn af riðunni. Væntingarnar um að fá hingað „gin- og klaufaveiki“ og berkla í bústofninn til þess að fella landbúnaðinn úr framhaldi af Íslandssögunni skil ég mæta vel, en alls ekki tilraunir til að fjölga veikindadögum á vinnumarkaði, það er óskiljanlegt.

Nú koma líka krakkarnir saman á Austurvelli að krefjast þess að rúllettuspilarar hætti að gambla með framtíð þeirra.

Krummi í Rjóðri

Flokkun : Pistlar
1,269