Daglegt mál 05/01/2018

Lögreglustjórinn leggur sig

Afturbeygða fornafnið sig reynist okkur erfitt viðfangs í daglegri notkun.

(Mynd: Wikiped.)

Dæmin um ofbeldið sem það verður fyrir eru legíó á hverjum degi, allir fjölmiðlar virðast vera jafnsekir og til þess að gæta jafnræðis skulum við engan nefna, en tiltaka þó raunveruleg dæmi.

´Hún sakaði manninn um að hafa reynt að drepa sig.´

Í fréttinni kom ekki fram hvers vegna manninum leið svona illa, en enginn skyldi þó hafa sjálfsvíg í flimtingum.

´Hann sagði konuna hafa slegið sig í höfuðið með flösku.´

Sjálfskvalalosti er þekkt mannleg kennd og allajafna ekkert við hana að athuga ef hún skaðar ekki aðra, en í fréttina vantar skýringu á því hvers vegna konan kaus að valda sjálfri sér þessu tjóni á höfði.

Mjög nýlegt dæmi er ´Hún segir lögreglustjórann hafa lagt sig í einelti.´

Einelti er viðurstyggilegt og getur verið beinlínis sálardrepandi fyrir þá sem verða fyrir því.

Það tekur þó væntanlega líka talsvert á þá sem beita því.

Það er eina hugsanlega skýringin á því hvers vegna lögreglustjórinn þurfti að leggja sig í miðju eineltinu.

Hún hefur verið orðin lúin.

K.

Daglegt mál
Daglegt mál

Latest posts by Daglegt mál (see all)

Flokkun : Pistlar
0,415