Fjölmiðlarýni 30/08/2017

Yfirburðirnir

Skoðanakannanir eru gagnlegar. En þó því aðeins að fólk kunni að lesa tölur.

Án þess verða túlkanir í bezta falli hæpnar.

Þetta gildir um nýjustu könnun Fréttablaðsins og Stöðvar 2 um fylgi flokka í borginni.

Vísir les hana þannig, að Sjálfstæðisflokkurinn hafi yfirburðastöðu í borginni.

Eyjan tekur svo upp ummæli helztu stjórnmálaskýrenda landsins um hversu allt sé ómögulegt við stjórn borgarinnar og ýmislegt annað. Einn þeirra, Egill Helgason, spáir endalokum á borgarstjóratíð Dags B. Eggertssonar. Sá pistill virðist að vísu vera horfinn af vefnum.

Gott og vel. Þetta kann að vera rétt, en tölurnar úr könnun Fréttablaðsins sýna það samt ekki. Þeir sem vilja halda þessum skoðunum fram þurfa að finna sér annan rökstuðning til þess.

Hví segi ég nú þetta? Jú, í frétt Vísis er gerð könnunarinnar lýst svona:

Könnunin var gerð þannig að hringt var í 1.063 manns í Reykjavík samkvæmt lagskiptu slembiúrtaki dagana 28. og 29. ágúst þar til náðist í 791. Svarendur skiptust jafnt eftir kyni og hlutfallslega eftir aldri. Svarhlutfallið var 74,4 prósent. Alls tóku 46 prósent þeirra sem náðist í afstöðu til spurningarinnar. Tólf prósent sögðust ekki ætla að kjósa eða skila auðu, tæp 18 prósent voru ekki búin að gera upp hug sinn og 24 prósent vildu ekki svara spurningunni.

Spurt var: Hvaða lista myndir þú kjósa ef gengið yrði til sveitarstjórnarkosninga í dag? Ef ekki fékkst svar var spurt: Hvaða flokk er líklegast að þú myndir kjósa? Ef ekki fékkst svar var spurt: Er líklegra að þú myndir kjósa Sjálfstæðisflokkinn, eða einhvern annan flokk?

Þetta hljómar býsna traustvekjandi eða hvað? Nei.

Þótt hringt hafi verið í rúmlega þúsund manns var ekki talað við nema 791. Og af þeim tóku rúmlega 360 afstöðu – 46 prósent.

Í könnun, sem byggist á svo fáum svörum, eru vikmörkin svo ævintýralega há, að tölurnar gefa í bezta falli vísbendingu og eru alls ekki til þess fallnar að draga afgerandi ályktanir, hvað þá fullyrða eins og lærðir stjórnmálaskýrendur gera.

Stærsta fréttin í þessari könnun er nefnilega að rúmlega helmingur treystir sér ekki til að svara því hvað hann ætlar að kjósa í Reykjavík næsta vor.

Og yfirburðir Sjálfstæðisflokksins? Hann er að sönnu með mest fylgi í þessari óáreiðanlegu könnun, en það er ekki fyrr en eftir að þráspurt hefur verið, eins og lýst er hér að ofan.

Það þurfti nánast að snúa upp á hendurnar á svarendum í þessari könnun til að tosa fylgi flokksins upp í 34 prósent. Sem þýðir líka, að hann á engan möguleika á að fá fylgi meðal hinna 66 prósentanna.

Það eru nú allir yfirburðirnar.

Karl Th. Birgisson

Fjölmiðlarýni
Fjölmiðlarýni

Latest posts by Fjölmiðlarýni (see all)

Flokkun : Pistlar
0,665