Vopnaðir friðarenglar

Tvisvar í síðustu viku bað ég um svör við nokkrum spurningum sem vöknuðu þegar Sjónvarpið flutti þá fregn að bandaríkjaher og Nató ætli að fjárfesta fyrir 14 miljarða hér á landi, og að bandaríski flugherinn ætlaði að koma upp gámaíbúðum fyrir eitt þúsund hermenn á Keflavíkurflugvelli. Mér varð svo mikið um fréttina að mér hvarf forsaga málsins, sem ég þekkti þó. Nú hefur hún skýrst á ný, forsagan, og áður en ég svara spurningum mínum sjálfur er rétt að biðja lesendur Herðubreiðar afsökunar á gönuhlaupi og fylgikvillum þess.

Sjónvarpið vann nefnda fréttina um að mannkynsbraskararnir væru að hefjast handa út frá útboðsauglýsingu um framkvæmdir á Vellinum. Braskararnir gættu þó ekki að því að það er ekki búið að samþykkja deiliskipulag á framkvæmdasvæðinu, öryggissvæðinu á Keflavíkurflugvelli!

Í samráðsgátt utanríkisráðuneytisins segir:
Deiliskipulagstillagan fjallar m.a. um afmörkun nýrra svæða fyrir starfsemi innan svæðisins, s.s. svæði fyrir skammtíma gistiaðstöðu, efnisvinnslusvæði, gistisvæði, geymslusvæði og aðra landnotkun og starfsemi.
Frestur til að gera athugasemdir rennur út 20. ágúst 2019.

Þannening að eins og svo oft áður í mannkynssögunni ana vopnaðir friðarenglar fram úr sjálfum sér í dýrðarljóma sjálfsupphafningar.

Það sem fennti yfir í huga mér við fréttaflutninginn í Sjónvarpinu var hver heimilaði þetta og hvenær. Það gerðist 1. september 2016 þegar lög um Þjóðaröryggisráð voru samþykkt á alþingi gegn atkvæðum allra þingmanna Vg, en með atkvæðum flestra annarra. Þar með voru lagðar leiðir til frekari Nató-leikja og komu Kanans til landsins. Það var ráðuneyti Sigurðar Inga Jóhannsson sem bruggaði þessi ráð og kom þeim fram. Með honum í stjórn voru meðal annars Bjarni Benediktsson, Kristján Þór Júlíusson, Gunnar Bragi Sveinsson og þáverandi flokkssystir hans, Lilja Alfreðsdóttir. Hún var utanríkisráðherra.

Í samráðsgátt forsætisráðuneytisins er meðal annars þetta að finna um Öryggis og varnarmál/Varnarsamstarf við Bandaríkin::

“Á síðustu misserum hafa umsvif herliðs Bandaríkjanna og annarra bandalagsríkja Atlantshafsbandalagsins aukist á norðaustanverðu Atlantshafi vegna breyttra aðstæðna í öryggismálum og versnandi öryggisumhverfis í Evrópu. Bandaríski sjó- og flugherinn hafa aukið reglulega viðveru á Keflavíkurflugvelli og samhliða því ráðist í nýjar framkvæmdir til að styðja við þessa viðveru. Það er gert á grundvelli sérstaks samkomulags íslenskra og bandarískra stjórnvalda frá árinu 2016. Hafnar eru framkvæmdir við breytingu á flugskýli til að hýsa nýjar kafbátaleitarflugvélar sjóhersins og sérstakri þvottastöð fyrir þessar sömu vélar. Á næstu tveimur árum hefjast framkvæmdir við akstursbrautir, flugvélastæði, lýsingar og bráðabirgðahúsnæði fyrir liðsafla. Jafnframt kosta íslensk stjórnvöld byggingu nýs gistirýmis vegna vaxandi tímabundinnar viðveru liðsafla bandalagsríkja á Íslandi.” (Undirstrikun texta og fitun orða er gerð af höfundi pistilsins.)

Að þessu sinni læt ég það á móti mér að ræða hræðsluáróður mannkynsbraskaranna sem augsýnilega hafa samið þennan texta til að hughreysta hræddu kallana, leikbrúður sínar. Þess í stað bendi ég á undirstrikuðu línurnar og feitu orðin; þar fellst vissan um að Kaninn er að koma. Aftur. Hann er að koma aftur!

Og ætti þá ekki að vera leyfilegt að spyrja hvort Alþingi beri ekki skylda til að fjalla um svo freklega innrás í þjóðlífið sem koma erlends setuliðs er ? Og leyfist ekki líka að spyrja svona: Er ekki rétt að hafa þjóðaratkvæðagreiðslu um mál sem varðar frelsi og sjálfstæði þjóðarinnar um ókomin ár?