Úlfar Þormóðsson 27/05/2019

Verum algáðir -kærum forseta!

Samkvæmt mbl.is klukkan 12:27 hafa samtökin Orkan okkar óskað eftir því, “að Vinnu­eft­ir­litið og/​eða lög­regl­an grípi til aðgerða vegna yf­ir­stand­andi brota á Alþingi á lög­um um aðbúnað, holl­ustu­hætti og öryggi  á vinnu­stöðum,” og af­hentu Vinnu­eft­ir­lit­inu kæru þess efn­is í morgun.

Nú hafa Miðflokksmenn talað við sjálfa sig á alþingi dag eftir dag, kvöld eftir kvöld og nótt eftir nótt. Af eigin hvötum, af eigin frjálsa vilja, af eigin fórnarlund til þess að sýna að þeir séu mestir allra Íslendinga í heiminum. Samkvæmt hvíslingum sem fóru heldur hátt var ætlun þeirra með málþófinu að egna Steingrím J. Sigfússon og forseta þingsins til þess að stöðva umræðuna svo hægt væri að sýna fram á það svart á hvítu að hann væri óvinur frjálsrar umræðu.

Það tókst ekki. Fyrir nokkrum nóttum höfðu þeir talað út og neyddust til að endurtaka sömu ræður aftur og aftur til þess að halda orðinu. Nú eru eru þeir orðnir þreyttir hver á öðrum en geta samt ekki hætt að tala saman úr ræðustól þingsins. Og þar sem forsetinn eftirlét þeim frelsið geta þeir ekki hætt að sjálfsdáðum. Þess vegna leituðu þeir ráða hjá stuðningssamtökum sínum, Orkunni okkar. Þar eru saman komnir andlegir yfirburðarmenn úr öllum flokkum, einsonar öldungaráð, vitringar. Og auðvitað fundu þeir ráð fyrir félaga sína, vitringarnir: Kærum forsetann fyrir að halda allt of langan vinnudag, kærum þingið fyrir brott á vinnulöggjöfinni.

Og röksemdarfærsla vitringanna er skotheld, dregin af reynslu Miðflokksmanna af öldrykkju á Klausturbar og afleiðingum hennar: Mik­il­vægt er að starfs­menn, ekki síst alþing­is­menn, geti haldið fullri ein­beit­ingu við störf sín.

Sam sagt: Góðir (bestu) Íslendingar. Dæmum forseta þingsins fyrir níðingsskap og þrælahald. Það er honum að kenna að við hófum málþófið og það er honum að kenna að við fáum ekki að hætta því!

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,483