Fjölmiðlarýni 15/08/2016

Vel gert, Vísir

Reglulega þurfa lesendur að spyrja sig spurninga um fjölmiðla.Reynslubolti

Sumar eru stórar, aðrar smáar. Sumar þó stórar í tiltölulega litlu samhengi.

Nýlegt dæmi er frétt Vísis um 23 ára gamlan mann, sem býður sig fram í prófkjöri Sjálfstæðisflokksins í suðurkjördæmi.

Í tilkynningu um framboðið telur hann upp ýmis störf sín, sem honum þykja væntanlega skipta máli fyrir þá sem hann á erindi við, þar á meðal störf fyrir Sjálfstæðisflokkinn í Reykjanesbæ. Einnig helstu hugðarefni sín og stefnumál.

Eðli málsins samkvæmt er reynsla unga mannsins ekki mikil.

En hvernig bregst Vísir við þessari framboðstilkynningu? Jú, með fyrirsögninni ´Reynslubolti gefur kost á sér´.

Lesandinn gæti ætlað að frambjóðandinn hefði kallað sjálfan sig þetta í tilkynningunni, í einhvers konar sjálfsháði sökum ungs aldurs. Slík stílbrögð virka oft betur en að gera of mikið úr sjálfum sér.

Nei. Það var Vísir sem ákvað að kalla frambjóðandann unga ´reynslubolta´ í háðungarskyni. Það var Vísir sem ákvað að henda gaman að honum og gera lítið úr persónu hans. Alveg að eigin frumkvæði.

Einhverjir kynnu að staldra við þá staðreynd að konan sem skrifar fréttina er litlu eldri en frambjóðandinn, en telur sig þess umkomna að hafa hann að skotspæni og athlægi. Það er röng nálgun. Ungir blaðamenn gera óhjákvæmilega mistök. Það er hins vegar ritstjóranna og fulltrúa þeirra að leiðrétta þau áður en fréttir eru sagðar.

Í þessu tilviki eru mistökin stór í smáu samhengi. Hér er níðst á ungum manni, sem býður sig fram til opinbers starfs, en ástæðan fyrir ofbeldinu er hvergi sjáanleg. Nema hugsanlega að á ritstjórninni hafi þótt fyndið að gera grín að ungum sjálfstæðismanni úr Keflavík. Eru þeir ekki allir glataðir hvort eð er, eins og dæmin sanna?

Hitt er hugsanlega ennþá verra að í athugasemdum við fréttina hafa lesendur Vísis ekkert við þessa framsetningu að athuga. Þeir halda áfram að níða skóinn af unga manninum, rétt eins og fyrirsögnin gefur tilefni til og beinlínis býður upp á.

Líklega finna fjölmiðlar alltaf sína lesendur.

Í þessu tilviki fær Vísir þá sem hann verðskuldar.

Flokkun : Pistlar
0,476