trusted online casino malaysia
Ritstjóri Herðubreiðar 02/06/2016

Skilnaðarbarnið í útskriftinni sinni

Í forsetakjörinu 2012 tók Stöð 2 þá einstæðu ákvörðun, að bjóða aðeins tveimur frambjóðendum af sex til umræðna í sjónvarpi, Ólafi Ragnari Grímssyni og Þóru Arnórsdóttur.Skilnaðarbarnið

Viðbrögð við þessari ráðstöfun voru mjög hörð og endaði með því að sjónvarpsstöðin skipti um skoðun, en þar með var málinu ekki lokið.

Í væntanlegri bók lýsir Karl Th. Birgisson þessari atburðarás sem „hreinum farsa“ og Herðubreið heldur áfram að birta örstutta kafla úr bók hans með leyfi útgefanda:

Svo fór, að allir frambjóðendurnir sex mættu til leiks í Hörpu, en þá höfðu þau nýfrétt af raunverulegu fyrirkomulagi umræðnanna.

Stöð 2 hafði ákveðið að spyrja aðeins tvo frambjóðendur í einu og þess vegna voru aðeins tvö púlt á sviðinu. Í ofanálag áttu frambjóðendur að koma fram í stafrófsröð, sem þýddi að saman á sviðinu yrðu Andrea og Ari Trausti, Hannes og Herdís, og Ólafur Ragnar og Þóra.

Það má teljast faglegur barnaskapur að ætla, að þetta fyrirkomulag teldist boðlegt eftir að upphaflega ætlunin var að sniðganga fjóra frambjóðendur.

Og hófst þá útsendingin.

Hún hófst reyndar með því að Andrea og Ari Trausti fóru fram á að fá að lesa yfirlýsingu. Við því var orðið og Ari Trausti byrjaði:

„Ljóst er að sá kappræðufundur sem okkur var boðið til er í raun fundur með spurningum og svörum til tveggja frambjóðenda í einu og þar með fjarri öllum umræðum frambjóðendanna sex. Af þessu fréttum við í dag og Þóra og Ólafur Ragnar standa saman í lokin eins og upphaflega var áætlað.

Sem lágmarkskröfu höfum við sett fram þá eindregnu beiðni, gerðum það í dag með fréttatilkynningu, að dregið yrði um röð frambjóðenda í pör. Bæði hvað varðar tímaröðina og einstaklinga sem standa saman.“

Andrea tók við: „Þessu hafnaði fjölmiðillinn af tæknilegum ástæðum, innan við klukkustund fyrir útsendingu. Að þessu fengnu ákváðum við, ég, Ari Trausti og Hannes, að yfirgefa fundinn og skora á Þóru og Ólaf Ragnar að gera slíkt hið sama. Okkur er misboðið.

Lýðræði er jafnrétti og jafnrétti er mannréttindi. Við viljum láta koma vel fram við okkur af öllum fjölmiðlum.“

Í miðjum málfutningi Andreu birtist Hannes og tók sér stöðu á milli þeirra.

Þegar Andrea hafði lokið að lesa yfirlýsinguna og Hannes bætt við „Verið þið sæl“ gengu þau þrjú út. Salurinn klappaði.

Í útsendingu Stöðvar 2 fór eðlilega allt í uppnám á meðan aðrir frambjóðendur, fréttamenn og áhorfendur áttuðu sig því sem hafði gerzt. „Ari Trausti hefur greinilega engu gleymt frá árum sínum hér á Stöð 2…“ sagði Þorbjörn Þórðarson í fáti. Svo var klippt í auglýsingar.

Það sem á eftir fylgdi var kostulegt. Þau stóðu þrjú við tvö púlt, Herdís, Ólafur Ragnar og Þóra, sú síðastnefnda í miðjunni og hafði því í rauninni ekkert púlt. Uppstillingin var tilviljun. Herdís bað um að fá að vera öðrum megin og Þóra játti því „af óþolandi kurteisi.“

Sjónrænt var uppstillingin sláandi. Herdís var ótrúlega lík Guðrúnu Katrínu Þorbergsdóttur, fyrrverandi eiginkonu Ólafs Ragnars, bæði hvað snerti hárgreiðslu og klæðaburð. „Þóra leit út eins og skilnaðarbarn í útskriftinni sinni“ á milli þeirra Ólafs.

(Úr 26. kafla: Þrjú á palli)

Lesa má nánar um bók Karls hér og tryggja sér eintak á forsöluverði.

Önnur kaflabrot má lesa hér, hér, hér og hér.

1,671