Skammist ykkar

Að lágmarki þrír fjölmiðlamenn birtu í gærkvöldi dylgjur um það, hvernig Bjarni Benediktsson tengdist leka á upplýsingum úr Seðlabankanum haustið 2008.

Þær voru samstofna og eiga það sameiginlegt, að þær eru fantasíur blaðamannanna.

Eiríkur Jónsson birti frétt um að eiginkona Sturlu Pálssonar, Helga Jónsdóttir, sem Sturla viðraði við skoðanir sínar um líklegar aðgerðir Seðlabankans og þar með afdrif gömlu bankanna, væri frænka Bjarna Benediktssonar.

Þau eru systkinabörn.

Eiríkur sá sóma sinn í því að setja þessa setningu í frétt sína: „Hér er því ekki haldið fram að Helga, eiginkona Sturlu, hafi sagt frændfólki sínu af Engeyjarættinni frá því hvað væri í vændum innan sólarhrings.“

Hinir tveir höfðu enga slíka fyrirvara.

Gunnar Smári Egilsson skrifaði á facebook:

„Engey er víða. Áður en neyðarlögin voru sett hringdi Sturla Pálsson, hagfræðingur í Seðlabankanum, í konu sína, Helgu Jónsdóttir, eins og fram kom í Kastljósi, og upplýsti um yfirvofandi aðgerðir bankans. Helga er dóttir Guðrúnar Sveinsdóttur, systur þeirra Einars og Benedikts Sveinssonar, stórtækra fjárfesta. Benedikt er faðir Bjarna, sem nú er fjármálaráðherra. Hann og Helga eru systkinabörn. Áður en neyðarlögin voru sett fengu Engeyingar því viðvörun og svigrúm til að bjarga sínu. Algjörir snillingar.“

Þetta er með nokkrum ólíkindum.

Getur ritstjóri Fréttatímans fundið því stað með einhverjum hætti, að ´Engeyingar´ hafi fengið viðvörun vegna þess sem Sturla sagði við eiginkonu sína?

Veit ritstjóri Fréttatímans til þess að ´Engeyingar´ séu svo samheldinn og samansúrraður hópur, að þar bresti á með fjöldasímtölum ef einhver fréttir eitthvað sem einhverjum kynni að þykja forvitnilegt eða gagnlegt?

Eru Engeyingar jafnvel með facebook-síðu þar sem þeir skiptast á innherjaupplýsingum?

Hringdi Helga Jónsdóttir kannski í Valgerði Bjarnadóttur, náfrænku sína? Hringdi Helga líka í Benedikt Jóhannesson, náfrænda sinn?

Hefur Gunnar Smári Egilsson slíkan aðgang að símtalaskrá þessa fólks hann geti fullyrt að gervöll ættin hafi ´fengið viðvörun´?

Eða er hann bara að dylgja um Bjarna Benediktsson?

Þriðji fjölmiðlamaðurinn, Illugi Jökulsson, dregur þó aðeins þessa og mun þrengri ályktun af frétt Eiríks:

„Alltaf dúkkar Bjarni Benediktsson upp þegar monkí bissniss er annars vegar. Dæmalaus óheppni alltaf.“

Með leyfi að spyrja: Hvar dúkkaði Bjarni Benediktsson upp í umfjöllun Kastljóssins eða yfirleitt í frásögnum af leka úr Seðlabankanum? Svarið er skýrt: Hvergi.

Nafn hans birtist aðeins í frétt Eiríks Jónssonar um ætterni, og hafði hann þó þá sómatilfinningu að setja fyrirvara í fréttina.

Hinir tveir, Gunnar Smári og Illugi, dylgja hins vegar alveg fyrirvaralaust og býsna hróðugir ofaníkaupið.

Þótt þeir geti hvergi nokkurs staðar fundið þessum hugarórum sínum fót.

Ætli finnist aðrir tveir fjölmiðlamenn sem hneykslast jafnmikið á því daglangt hversu óvönduð íslensk umræða er, rangt farið með staðreyndir, dylgjað, bullað og snúið út úr, og hversu slæm áhrif slík hegðun hefur á samfélagið og lýðræðið?

Hvað kemur þeim til þess arna sjálfum? Er kannski allt í lagi að skálda upp og birta sem staðreyndir hugdettur um einstakling af því að hann heitir Bjarni Benediktsson?

Hver sem skýringin er, þá er framkoman óboðleg ef við eigum einhvern tímann að komast upp úr sóða- og slóðahugsun.

Og þeir ættu að biðjast afsökunar sirka núna.