Ritstjóri Herðubreiðar 02/05/2014

Ráðuneyti eða stofnanir hafa ekki þurft að „aðlagast“ vegna umsóknar um aðild að ESB. Forsætisráðherra svarar með útúrsnúningi

Nú liggja fyrir á alþingi svör sex ráðuneyta við fyrirspurn Guðbjarts Hannessonar alþingismanns, um hvaða breytingar á lögum á málefnasviði eða stofnunum þeirra frá 2009 megi rekja til „aðlögunar að Evrópusambandinu.“Ríkisstjórn B og D

Guðbjartur spurði einnig hvaða breytingar væru eingöngu vegna aðildarumsóknar og viðræðna við ESB, og hverjar mætti rekja til EES-samningsins.

Herðubreið hefur áður greint frá svari utanríkisráðherra, en nú hafa fleiri bæst við.

Öll svara ráðuneytin efnislega eins: Engar breytingar á lögum, umfram þær sem EES-samningurinn krefst.

Svar umhverfisráðherra hefst svona: „ Ekki hafa verið gerðar breytingar á lögum sem rekja má til aðlögunar að Evrópusambandinu (ESB) frá árinu 2009.“

Svar sjávarútvegs og landbúnaðarráðherra hefst svona: „Ekki hafa verið gerðar breytingar á lögum sem rekja má til aðlögunar að Evrópusambandinu (ESB) frá árinu 2009.“

Heilbrigðisráðherra nefnir að í athugasemdum við tvö lagafrumvörp (um sjúkraskrár og geislavarnir) hafi verið vísað til stefnumörkunar innan ESB og tillit tekið til hennar vegna samræmingarsjónarmiða.

Við seinni spurningunni – Hvaða breytingar voru eingöngu vegna aðildarumsóknar og viðræðna við ESB? – er svarið: „Engar.“

Mennta- og menningarmálaráðherra svarar: „Engar breytingar voru eingöngu vegna aðildarumsóknar og viðræðna við ESB,“ en vísar þó til ábendinga framkvæmdastjórnar ESB um innleiðingu tilskipana, sem sagt er að hafi staðið „í tengslum við aðildarviðræðurnar en sneru að túlkun og innleiðingu á tilteknum ákvæðum í framangreindum tilskipunum.“ Ekki kemur fram hvernig innleiðing þeirra tilskipana tengdist aðildarviðræðum.

Forsætisráðherra svarar spurningum Guðbjarts ekki beint, en vitnar í þrenn lög (um Hagstofuna, skil á menningarverðmætum milli landa og upplýsingalög). Þar af eru tvenn innleiðingar vegna tilskipana ESB, en um þau þriðju segir: „Í athugun er í ráðuneytinu að innleiða viðkomandi EES-gerðir, sem varða hagskýrslugerð.“

Lokasetningin í svar forsætisráðherra er svona:

„Ekki liggur fyrir formlegt mat á því hvort meðferð fyrrgreindra mála hefði verið önnur án aðildarumsóknarinnar.“

Latest posts by Ritstjóri Herðubreiðar (see all)

Flokkun : Efst á baugi
0,525