Ritstjórn 04/06/2017

Óvænt útgáfutíðindi: Ljóðabók eftir Karl Th. Birgisson – „Líklega bara fyrir sérvitringa“

„Aldrei slíku vant er ég blásaklaus. Þessi útgáfa er ekki mér að kenna,“ segir Karl Th. Birgisson ritstjóri Herðubreiðar, en síðar í mánuðinum kemur út fyrsta ljóðabók hans, Blóðsól.Blóðsól kápa

„Góður vinur minn setti mér þá lífsreglu í fyrra, að koma út einni bók á ári það sem eftir er. Ég get ekki óhlýðnast honum, hann er þannig. Að vísu var ég með aðra bók í huga, en ég átti þessar ljóðamyndir til án þess að ætla að gera neitt með þær. Ég sýndi þær góðu og smekkvísu fólki, og viðbrögðin voru þannig að þetta varð að gefa út.“

Guðmundur Andri Thorsson segir svo um verk Karls: „Ferðaljóð, ástarljóð, mannlýsingar, náttúrulýsingar, svipmyndir úr mannlífinu – yrkisefnin eru margvísleg og efnistökin fjölbreytt. Þessi ljóð vitna um sterkt formskyn, hið glögga auga og gott vald á máli og myndum.“

„Ég roðnaði reyndar þegar ég las þetta frá Andra, sem hefur öðrum fremur vit á texta,“ bætir Karl við.

Anna Sigrún Baldursdóttir hafði þetta að segja: „Ljóð Kalla eru sum hrá, jafnvel hvefsin svo manni bregður við sannleikann í þeim. Mannlýsingarnar eru sérstaklega eftirtektarverðar, hnyttnar og óþægilega kunnuglegar. Við erum þarna öll.“

Árni Þórarinsson bætir þessu við: „Óvænt úr óvæntri átt og þó ekki, en beint frá hjarta sem slær óreglulega.“

Blóðsól er aðeins prentuð í 300 tölusettum eintökum og verður ekki til sölu í bókabúðum, en hægt er að panta hana frá útgefanda í netfanginu herdubreid@herdubreid.is.

„Það er ekki meira á umhverfið leggjandi en 300 eintök,“ segir Karl. „Vonandi er efnið boðlegt og jafnvel áhugavert, en það eru varla nema mestu sérvitringar sem vilja eiga ljóðabók eftir mig.“

Hér eru þrjú ólík ljóð úr bókinni:

(Þú I)

Hvernig þú sveiflar
hárinu
til að dylja depurðina í augunum

Hvernig þú sveiflar
augunum
til að hylja húmið í sálinni

Hvernig þú sveiflar
sálinni
til að grípa með henni gleðina

Hvernig þú sveiflar
gleðinni
til að finna fyrir lífinu

Hvernig þú sveiflar
lífinu

(Mannlýsing III)

Meðalmaður og ófríður.
Þéttholda.
Þungur í skapi.
Geðríkur.
Brosgjarn þegar óvænt hugsun finnst.
Óbilgjarn annars.

(Rauðafell)

Við dáðumst að afrísku brimi
sverfa svarta kletta
þrír vonglaðir Vopnfirðingar
einn raunsær Breiðdælingur

Dáðumst að briminu
mylja landið
grafa undan sjávarbyggðinni

Í fjarska stóð Rauðafell:
Þarna er Gunnólfsvíkurfjall
sögðu þeir kímnir

Þar sem við snerumst á hæli
sást í baksýn brimið
berja lífið niður
í rauða möl

0,455