Spegillinn 08/03/2016

Kjósendur innkalla atkvæði

Hópur fólks sem kallar sig Skömmustulegir kjósendur Framsóknarflokksins hefur innkallað atkvæði sín úr síðustu alþingiskosningum.Framsókn

Í yfirlýsingu segir hópurinn ákvörðunina einkum byggða á fjórum ástæðum:

* Framsóknarflokkurinn lofaði að gefa okkur peninga. Við vorum látin gefa okkur peningana sjálf.

* Framsóknarflokkurinn lofaði að afnema verðtrygginguna. Við borðum verðtryggingu í morgunmat á hverjum degi.

* Framsóknarflokkurinn lofaði að stækka þjóðarkökuna. Hér hefur ekkert stækkað nema undirhakan á forsætisráðherra.

* Framsóknarflokkurinn lofaði betra veðri. Hér hefur rignt og snjóað samfellt í þrjú ár og spáin er slæm.

En er hægt að innkalla atkvæðin sín? Er það ekki of seint þegar þau hafa verið greidd?

„Það er hægt að innkalla Mars og Myllubrauð. Eru atkvæðin okkar eitthvað ómerkilegri?“

Sumir mundu segja það, já. En hvers vegna viljið þið ekki koma fram undir nafni?

„Við erum ekki stolt af því sem við gerðum. Okkur finnst nóg af einelti og uppnefnum í samfélaginu og viljum ekki kynda undir því. Allir gera mistök og okkar framlag til betra samfélags er að gangast við þeim, innkalla atkvæðin og reyna aftur.“

Hvernig er hægt að leggja hreyfingunni lið?

„Við höldum vikulega fundi undir merkjum SKFA – Skömmustulegir kjósendur Framsóknarflokksins Anonymous. Þangað eru allir velkomnir sem þurfa að sækja sér stuðning og samkennd.“

Hvar eru þessir fundir haldnir?

„Að Hrafnabjörgum III í Jökulsárhlíð. Það er mjög hentugur staður. Þangað kemur aldrei nokkur lifandi sála.“

Spegillinn
Spegillinn

Latest posts by Spegillinn (see all)

Flokkun : Pistlar
0,570