Icehot2

Til Spegilsins var lekið upptöku af samtali Bjarna Benediktssonar og Birgis Ármannssonar í gær. Það er ekki fyrir viðkvæma.

BB: Sæll Birgir minn.

BÁ: Já, sæll.

BB: Heyrðu – nú er Hanna Birna komin aftur og við þurfum að gera breytingar.

BÁ: Jæja?

BB: Já, hún er oddviti í Reykjavík, varaformaður flokksins og svona, svo að hún verður að fá sitt.

BÁ: Jæjajá?

BB: Já, þú veist hvernig þetta er.

BÁ: Jájá.

BB: Ég ætla að gera hana að formanni utanríkismálanefndar í staðinn fyrir þig.

BÁ: Ha?

BB: Já. Hún þarf að fá nefndarformennsku.

BÁ (röddin titrar örlítið): Heyrðu nú, Bjarni minn. Veit Hanna Birna eitthvað um utanríkismál? Hefur hún komið út fyrir Reykjavík? Og… Og… (hvíslar) Hvað ef hún lýgur að þinginu aftur?

BB: Hva! Hún þarf ekkert að vita um utanríkismál. Var ekki Árni Þór formaður á undan þér? Og svo kemur snilldin: Við gerum þig að fyrsta varaformanni eftirlits- og stjórnskipunarnefndar. Ef Hanna Birna byrjar að ljúga að þinginu aftur kemur þú veg fyrir að eftirlits- og stjórnskipunarnefnd geri einhverja vitleysu. Þú passar upp á hana. Líka ef nefndin ætlar að fara taka upp þetta gamla þarna.

BÁ: Af hverju ég? Getur Brynjar ekki farið í þetta? Hann er vanur að bulla fyrir hana.

BB: Ég treysti þér best. Svona ábyrgðarhlutverk fel ég ekki hverjum sem er. Þú ert maðurinn. Ef vel gengur geturðu jafnvel farið að kalla þig Icehot2.

BÁ (eftirvænting í röddinni): Heldurðu það?

BB: Engin spurning, Birgir minn. Þú ert maðurinn.

BÁ: Ókei. Gerum þetta. (Hugsi og röddin fjarar út) Icehot2…? (Heyrist kyngja)