Úlfar Þormóðsson 16/08/2019

Heimskviður

Í dag, 16.08.´19, berast fréttir af því að menntamálaráðherra hafi í hyggju að vega að tekjustofni Ríkisútvarpsins með því að taka það af auglýsingamarkaði – banna þeim sem þarf að láta vita af sér að nota áhrifamesta auglýsingamiðil landsins -. (Væri slík gjörð ekki brot á stjórnarskrárvörðu frelsi einstaklingsins?) 

Ástæðan fyrir ætlun ráðherrans er krafa “frjálsu” fjölmiðlanna, sem vilja hirða auglýsingatekjurnar. Ein augljós afleiðing þessa yrði sú að Ríkisútvarpið verður háðara fjárveitingum frá alþingi en nokkru sinni, og þegar ástmenn “frjálsu” fjölmiðlanna fá meirihluta á þinginu mun útvarpið verða svelt í öngvit. 

Í dag, dag vondra frétta, hleypti Ríkisútvarpið, Rás 1, af stokkunum þættinum Heimskviður þar sem fjallað var og verður áfram um tíðindi utan úr heimi og fluttar faglega unnar fréttaskýringar, nokkuð sem engin hinna svo nefndu “frjáls” fréttamiðla getur haldið úti eða vill halda úti. 

Þáttur dagsins var skýr. Hann var fróðlegur. Hann var þarfur. 

Og: 

Slíkur þáttur getur, ef hann fær að lifa, hjálpað til við að kveða niður falsfréttir sem tröllríða “frjálsu” fjölmiðlunum hér og erlendis. 

Menntamálaráðherra og þingmenn allir ættu að hlusta á Heimskviður áður en þeir ákveða að svæfa Ríkisútvarpið í öngvit. Hann verður endurfluttur á morgun á Rás 1 klukkan 22:10.

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,448