Úlfar Þormóðsson 01/10/2018

Átfrekja

„Hvað gerist á leiðinni frá skipi og inn í fiskvinnslu sem eykur verðmæti aflans um 156 milljarða á tímabilinu? Getur hugsast að verið sé að svína á hlut sjómanna á enn einni vígstöðinni og þá um leið á samfélaginu í heild sinni?“

Þannig spyr Heiðveig María Einarsdóttir, sjómaður og viðskiptalögfræðingur í athugasemd við frumvarp atvinnuveganefndar Alþingis um veiðigjöld sem Kristján Þór Júlíusson, sjávarútvegsráðherra kynnti í liðinni viku.

Athugasemdir Heiðveigar eru birtar í Kvennablaðinu í dag 1. október 2018.

Heiðveig mótmælir því að til standi að hætta að reikna fiskvinnslu til gjaldstofns veiðigjalds. Hún segir þá tilhögun gefa „aukið svigrúm til þess að lækka uppgjörsverð til sjómanna til þess að lágmarka gjaldstofn til útreiknings á veiðigjaldi“. Þar með fái útgerðaraðilar aukið „aukið svigrúm til þess að taka hagnaðinn fremur út úr vinnslunni“.

„Þá segir Heiðveig að brotalöm sé í verðmyndun á fiski, upplýsingar úr opinberum gögnum bendi til þess að sjómenn fái ekki gert upp á réttum verðum,“ segir í Kvennablaðinu..

Einnig bendir Heiðveig á að á „meðan afli var metinn til hérumbil sama verðs árið 2005, hvort heldur sem er í uppgjöri við sjómenn eða uppgjöri við fiskvinnslur, hafi aflaverðmætið, átta árum síðar, verið skráð nær þriðjungi hærra í uppgjöri við fiskvinnslu en sjómenn“.

„Eftir fréttir síðustu missera af skattaskjólum efnaðra Íslendinga,“ segist Heiðveig ekki geta annað en velt upp þeim spurningum til frumvarpshöfunda hvort hugsast geti að „verið sé að svína á hlut sjómanna á enn einni vígstöðinni og þá um leið á samfélaginu í heild sinni“, að „útgerðin sé að greiða sjómönnum of lágt verð fyrir aflann með skipulögðum hætti?“ (Orðrétt úr Kvennablaðinu.)

Athugasemdir Heiðveigar eru rökstuddar. Þingmenn verða að greina þær og taka tillit til þess sem þar er réttilega fram sett. Og á það við um þá alla, hvort sem þeir styðja ríkisstjórnina eða ekki, hvort sem þeir búa úti á landi eða í hundrað og einum. Þetta er ekki kjördæmamál. Þetta varðar siðferði. Málið snýst um átfrekju stórútgerðarinnar.

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi, Pistlar
0,447