Víkingaminjar finnast óvænt í Michigan. Sólarrafhlöður klára orku frá sólinni. Satt og logið á vefnum
Síaukin notkun jarðarbúa á sólarrafhlöðum mun smám saman draga alla orku úr sólinni og lækka hitastig á jörðinni um þrjátíu gráður á næstu tuttugu árum.
Þetta er niðurstaða rannsóknar vísindamanna við Wyoming Institute of Technology, sem sagt er frá í bandaríska vefmiðlinum National Report í gær.
Þessi sláandi tíðindi hafa eðlilega vakið bæði ugg og umræður meðal jarðarbúa, sem tugþúsundum saman vilja stemma stigu við notkun á sólarrafhlöðum og jafnvel banna þær. Hafa um þetta spunnist harðvítugar deilur á samfélagsmiðlum og víðar.
Í gær var einnig greint frá því að fundist hefðu hátt í tvö hundruð munir við Huron-vatn í Michigan, sem greinilega væru norrænir, og bylti þessi fundur þar með öllum fyrri hugmyndum um landnám norrænna manna í Vesturheimi.
Fréttina flutti bandaríski vefmiðillinn World News Daily Report.
Meðal þeirra sem deildu þessari sögulegu frétt á facebook var fyrrverandi mennta- og menningarmálaráðherra Íslands, Björn Bjarnason, sem spurði um leið:
„Merkileg frétt. Hvað segja þeir hér á landi sem hafa kynnt sér Vínlandsferðir og getið sér til um hvert víkingarnir fóru?“
Fjölmargir töldu rétt að deila þessari uppgötvun Björns.
Um tíðindin spruttu eðlilega talsverðar umræður innan vinahóps Björns Bjarnasonar, þau væru sannkölluð heimsfrétt, og meðal þeirra sem tjáðu sig var Marta Bergman, sem veltir fyrir sér hvort ekki skuli hafa fundist örvaroddar. Annað væri undarlegt.
Þetta var þó eftir að Birni og öðrum hafði verið bent á, að World News Daily Report er þekkt skáldskaparfréttasíða á veraldarvefnum og að myndin, sem birtist með „fréttinni,“ er af víkingamunum sem fundust í Noregi fyrir alllöngu.
Meðal annarra frétta á sömu síðu er ein af manni fyrir framan geimskutlu sem hann framleiddi með þrívíddarprentaranum sínum og önnur um að herpes hefði læknað mann af blindu.
Af sólinni er það að segja, að hún tórir jafnvel eitthvað enn, þrátt fyrir sólarrafhlöðurnar. National Report, sem flutti hin ógnvænlegu tíðindi um yfirvofandi orkuskort sólarinnar, er vefmiðill í sama flokki og Baggalútur og The Onion, sem segja gjarna fréttir sem eiga sér ekki endilega stoð í raunveruleikanum.
Wyoming Institute of Technology (witscience.com) er heldur ekki til.
