Til huggunar (brot)

XV

Ef fólk vissi af því þá þætti því kannski furðulegt að ég er alltaf með pakkaða tösku undir rúmi. Það er gömul íþróttataska sem ég ætla að grípa með mér ef ég þarf skyndilega að flýja. Ég veit auðvitað ekki nákvæmlega af hverju ég gæti þurft að flýja, en ég held til dæmis að allt Ísland sé á virku eldgosasvæði. Svo er líka hugsanlegt að það komi stríð eða flóðbylgja af völdum loftsteins. Í töskunni er nærföt og bolur, tannbursti og tannkrem, handklæði, ullarsokkar, vasaljós, hafrakexpakki og einnota rakvél. Einu sinni var líka peli af rommi í töskunni, en hann er þar ekki lengur. Við hliðina á töskunni er kaðalstigi sem ég ætla að nota til að klifra niður af svölunum ef upp kemur eldur í húsinu.

Þórdís Gísladóttir, Tilfinningarök (Bjartur, 2015)