Sveitarfélögum er skylt að leggja trúfélögum til ókeypis lóðir. Stjórnarskráin áskilur jafnrétti milli trúfélaga
Guðfinna J. Guðmundsdóttir
Sveitarfélögum er ekki heimilt að rukka trúfélög fyrir lóðir sem þau fá úthlutað fyrir tilbeiðsluhús sín. Þeim er einnig skylt að undanskilja slíkar lóðir gatnagerðargjöldum.
Svo sem kunnugt er hefur oddviti Framsóknarflokksins í Reykjavík, Sveinbjörg Birna Sveinbjörnsdóttir, lýst sig andvíga allri úthlutun lóða til annarra trúfélaga en þjóðkirkjunnar.
Annar maður á lista Framsóknar, Guðfinna Jóhanna Guðmundsdóttir, vill ekki ganga svo langt, en segir í viðtali við Vísi:
„Ég er á móti því að það eigi að gefa lóðir til trúfélaga.“
Í fimmtu grein laga um Kristnisjóð o.fl. (nr. 35/1970) segir svo:
„Sveitarfélögum kaupstaða og kauptúna er skylt að leggja til ókeypis lóðir undir kirkjur og undanskilja þær gatnagerðargjaldi.“
Lögfræðingar hafa komist að þeirri niðurstöðu að jafnréttis- og mannréttindaákvæði stjórnarskrárinnar heimili ekki að sveitarfélög mismuni á grundvelli trúarbragða og því gildi sama regla um önnur trúfélög og gildir um þjóðkirkjuna.
Til þess að stefna annars manns á lista Framsóknarflokksins geti orðið að veruleika yrði því að fella úr gildi annaðhvort fimmtu grein laga um Kristnisjóð eða það ákvæði stjórnarskrárinnar sem bannar mismunun vegna trúarviðhorfa.
