Sonnetta (á heimili Ingmars Bergmans)

Eftir Ágúst Guðmundsson

Svo sem í skuggsjá horfði hann á verkin,

hver hans kvikmynd: eigin spegilmynd.

Persónurnar voru minnismerkin

mótuð af hans eigin erfðasynd.

 

Þeirra líf var líkast því hann dreymdi

liðna daga úr eigin sálarborg.

Hugsun þeirra í huga sér hann geymdi

hrærðist jafnt í gleði þeirra og sorg.

 

Enn þegir guð, þótt hrópað sé og hvískrað

í hugverkum og leiklist þessa manns.

Á tjaldinu er talað enn og pískrað

um tilgang lífsins, fjarvist skaparans.

 

Myndskáldið dó, en mál hans ekki um sinn:

í myndum kvikum lifir draumurinn.

 

Ágúst Guðmundsson

(Sonnettan var skrifuð í gestabók á heimili Bergmans, þar sem höfundur dvaldi í september 2015.)