Sitthvað er mikið að í Reykjavík. Húsasmiðjuteip, húsgögn tefja talningu og kjörstjórn sem er mjög líklega ólögmæt sjálf

Tilkynningar yfirkjörstjórnar um greidd atkvæði í Reykjavík í gærkvöldi sýndu áður óþekktar sveiflur í fylgi flokka, svo að fróðustu menn muna ekki annað eins. Um þetta voru Bogi Ágústsson fréttamaður og Ólafur Þ. Harðarson prófessor sammála í kosningasjónvarpi Ríkisútvarpsins.

Formaður kjörstjórnar í Reykjavík þurfti einnig ítrekað að endurtaka tölur í kosningasjónvarpinu þangað til þær sýndu innra samræmi.

Undir morgun leit svo út að verið væri að leita að týndum atkvæðum, kassar voru hristir, þeim velt við og þreifað í þeim.

Yfirkjörstjórninni tókst ekki að koma lokatölum til skila mörgum klukkustundum eftir að allar aðrar kjörstjórnir höfðu lokið verkum sínum.

Snemma á sunnudagsmorgni taldi formaður kjörstjórnar ekki rétt eða tímabært að greina frá um tuttugu þúsund atkvæðum, sem talin höfðu verið, þangað til gengið hefði verið úr skugga um skekkju sem nam um fjörutíu atkvæðum. Þessa munu varla fordæmi í kosningum, eins og Ólafur Harðarson furðaði sig á í kosningasjónvarpinu og velti fyrir sér upplýsingarétti almennings sem beðið hefði klukkustundum saman eftir niðurstöðum kosninga.

Kjörstjórnin í Reykjavík hefur tvívegis áður í nýliðnum kosningum vakið athygli fyrir vinnubrögð sem virðast ekki tíðkast í öðrum kjördæmum.

Í þjóðkjöri um spurningar í drögum að nýrri stjórnarskrá haustið 2012 lauk talningu í Reykjavíkurkjördæmi norður ekki fyrr en sólarhring síðar en í öllum öðrum kjördæmum landsins. Formaður kjörstjórnar, Katrín Theódórsdóttir, kenndi Ráðhúsinu um sem talningarstað og óhentugum húsgögnum.

Í síðustu alþingiskosningum, árið 2013, leiddi sami formaður kjörstjórnar fréttamann að innsigluðum dyrum talningarstaðar, þar sem límband virtist varna óviðkomandi inngöngu. Í ljós kom að hið meinta innsigli var límt á rennihurðina miðja og hindraði ekki aðgang neins að talningarstaðnum. (Sjá myndband hér fyrir neðan.)

Nýr formaður kjörstjórnarinnar er ungur lögmaður, Tómas Hrafn Sveinsson, en með honum í stjórninni eru áðurnefnd Katrín og Kristín Edwald. Ekki kemur fram í opinberum gögnum Reykjavíkurborgar hvernig þau voru valin til starfans.

Við athafnir kjörstjórnarinnar bætist, að hún virðist sjálf ekki vera kjörin lögmætri kosningu.

Í lögum um kjör til sveitarstjórnar (14. grein) segir að yfirkjörstjórn skuli kosin á fyrsta fundi nýkjörinnar sveitarstjórnar til fjögurra ára í senn. Þetta var ekki gert í Reykjavík eftir kosningarnar árið 2010, heldur skipaði borgarstjórn kjörstjórnina í október á síðasta ári, 2013.

Í lögunum segir að sérstaklega sé mikilvægt að kjörstjórn sé kosin, en ekki skipuð af meirihluta sveitarstjórnar, svo að hún sé sjálfstæð í störfum sínum, en ekki háð ákvörðunarvaldi starfandi meirihluta.

Að sögn Ríkisútvarpsins hafa kosningar í Reykjavík þegar verið kærðar vegna þessara meintu lögbrota.

Ekki hafa borist fregnir af viðlíka vandamálum í öðrum kjördæmum.