Mikilvægt að aflétta skömminni

Ásmundur Friðriksson alþingismaður ákvað í gær að gera sig að fífli frammi fyrir alþjóð. Hann kveðst hafa íhugað lengi að stíga þetta skref.

„Ég er talsmaður gagnsæis og taldi rétt að þjóðin fengi loks rétta mynd af mér,“ sagði Ásmundur í einlægu viðtali við Spegilinn. „Eitt af því sem Hrunið kenndi okkur er mikilvægi þess að allt sé uppi á borðum. Leyndarhyggjan má ekki ná tökum á okkur aftur.“

Aðspurður um viðbrögð segir Ásmundur þau hafa verið gríðarlega sterk. „Það hefur verið ákveðin þöggun í gangi og fólk virðist hafa skammast sín fyrir að vera fífl. Það er mikilvægt að aflétta skömminni og tala hreint út. Vð fíflin höfum verið ákveðin fórnarlömb og fólk hefur ekki haft skilning á aðstæðum okkar. Það er til dæmis hvergi gert ráð fyrir okkur í félagslega kerfinu.

Ég vil leggja mitt af mörkum til þess að litið verði á fífl eins og annað fólk og að okkur sé veittur sanngjarn stuðningur. Í þeim tilgangi hef ég þegar lagt drög að stofnun Íslandsdeildar IA, sem ég geri ráð fyrir að fái nauðsynleg framlög strax á næstu fjárlögum enda veit ég um marga í ríkisstjórnarflokkunum sem eins er ástatt um.“

Fyrir hvað stendur IA?

„Idiots Anonymous.“