Lifi einkaframtakið!

Ég hef stöku sinnum nefnt það í bloggpistlum mínum, að sennilega þurfi lögreglan sáralitlar eða kannski engar fjárveitingar úr ríkissjóði. Ekki þarf annað, en að gera út hluta starfsliðsins til að sekta ökumenn fyrir of hraðan akstur, ranga (eða oftast enga) notkun stefnuljósa, akstur gegn rauðu ljósi o.s.frv. o.s.frv.

Ég þarf ekki annað en að standa stutta stund á bæjarhlaðinu heima hjá mér á kvöldin til að sjá hundraðþúsundkallana streyma upp og niður Sæbrautina – og framhjá ríkissjóði. Fyrir ríkissjóð, sem er svo illa stöndugur að hann hefur hvorki efni á að skera sjúklinga upp né niður, er bílaumferðin augljóslega mjög vannýtt auðlind.

En loksins virðist einhver hafa tekið mark á þessu rausi mínu.

Lögreglumaður austur á landi er nú grunaður um að hafa sektað ökumenn fyrir of hraðan akstur og stungið sektarfénu í eigin vasa. Maðurinn hefur sem sé komið auga á þessa augljósu gróðalind lögreglunnar og ákveðið að taka málið í sínar hendur – sem nokkurs konar verktaki í einkaframkvæmd.

Mér líst satt að segja fremur vel á hugmyndina og mæli með, að maðurinn verði strax ráðinn til áframhaldandi starfa sem verktaki. Ég er viss um hann er – að fenginni reynslu – reiðubúinn til að taka að sér innheimtu sekta af brotlegum ökumönnum upp á prósentur.

Og það má stundum taka undir með sjálfstæðismönnum: Af hverju ætti ríkið að vera að vesenast í atvinnurekstri, sem einkaframtakið getur sinnt miklu betur?

Þetta er sennilega ljómandi gott dæmi um ágæti einkaframtaksins. Verktakar munu sinna þessu brýna verkefni af meiri áhuga og alúð en lögreglan getur nokkru sinni gert, enda ráðast tekjur hvers og eins af ákefð hans og dugnaði.

Hér er komið gráupplagt tækifæri til að slá heilar þrjár flugur í einu höggi: Draga úr atvinnuleysi, fækka umferðarslysum og auka tekjur ríkissjóðs. Ég sé fyrir mér að þetta geti orðið blómleg atvinnugrein í mjög náinni framtíð.