trusted online casino malaysia
Karl Th. Birgisson 07/02/2019

Kostnaðurinn

Eitt sinn var haft á orði að Indriði H. Þorláksson mætti ekki sjá skattstofn án þess að verða ástfanginn af honum.

Það var reyndar ágætur brandari, en ósanngjarn líka. Indriði er nefnilega einn af okkar allra færustu skattasérfræðingum, ekki bara að þekkingu og reynslu, heldur að lífsviðhorfi.

Indriði veit nefnilega að tilgangur skatta á ekki bara sá að afla tekna. Skattkerfið á að ýta undir jöfnuð og taka mið af félagslegum aðstæðum fólks.

Þetta hefur nú sannazt einu sinni enn, þegar Indriði hefur ásamt Stefáni Ólafssyni kynnt skattatillögur Eflingar. Þær eru mjög prógressívar og skyldar þeim sem Alþýðusambandið kynnti á dögunum. Megintilgangurinn er að færa skattbyrðina aftur yfir á þá, sem eiga og þéna mest, en létta henni af þeim sem minnstar hafa tekjurnar.

Þessar tillögur minna líka á skattabreytingarnar sem vinstri stjórnin 2009-2013 stóð fyrir enda hafði Indriði mikil áhrif á þær.

Þær endurspegluðu ennfremur lífsviðhorf félagshyggjufólks í Samfylkingu og Vinstri grænum.

Jæja. Nú er Katrín Jakobsdóttir formaður Vinstri grænna og forsætisráðherra. Hún er áreiðanlega í hjarta sér samþykk flestum þeim tillögum sem launþegahreyfingin hefur nú lagt fram.

Samt sem áður mun ríkisstjórnin ekki samþykkja neitt sem nálgast þessar róttæku tillögur.

Fyrir því er ein og aðeins ein ástæða: Formaður Sjálfstæðisflokksins er fjármálaráðherra. Sjálfstæðisflokkurinn mun aldrei samþykkja neitt sem gengur þvert á hagsmuni skjólastæðinga hans, stórfyrirtækjanna, hinna ríku og ofurríku.

Þetta er einn kostnaðurinn sem Vinstri græn bera af því að vera í ríkisstjórn með Sjálfstæðisflokknum.

Hinn er til dæmis lægri gjöld á sjávarútveginn og nýr flatur skattur, vegaskattur, svo aðeins það tvennt sé nefnt. Upptalningin gæti verið mun lengri.

Það er nefnilega rándýrt að vera í ríkisstjórn með Sjálfstæðisflokknum. Það er dýrt fyrir allt almennt launafólk og það er dýrt fyrir samfélagið. Þess vegna á ekki að vera í ríkisstjórn með Sjálfstæðisflokknum.

Þetta vita náttúrlega Katrín og félagar hennar í Vinstri grænum. Samt gera þau allt annað.

Þau hefðu getað verið í annars konar ríkisstjórn, sem hefði samþykkt lungann úr tillögum launþegahreyfingarinnar. En þau kjósa að gera það ekki.

Kostnaðurinn sem því fylgir hlýtur að ganga mjög hratt á innistæðuna í samvizkubauknum.

1,836