Margrét Tryggvadóttir 06/09/2016

Hugrekki og kjarkur

header_print

Framundan eru spennandi kosningar til Alþingis. Sjaldan hefur staðan verið eins opin. Átta árum eftir hrunið er rykið enn ekki sest en við sjáum þó hvernig í hlutunum liggur. Þræðir valds og spillingar eru greinilegir og þeir liggja víða. Stór hópur kjósenda virðist ætla að veðja á nýja hesta og hafna þeim sem lengst hafa starfað.

Það er skiljanlegt því stjórnmálin hafa enn ekki áunnið sér traust eftir hrunið. Í sumum tilfellum er það verðskuldað – sumir stjórnmálamenn eru ekki traustsins verðir – í öðrum tilfellum óverðskuldað. Við því er lítið að gera annað en að reyna að standa sig og gera sitt besta og halda áfram að leggja gott til.

Ég býð mig fram í 1.–2. sæti í flokksvali Samfylkingarinnar í suðvesturkjördæmi. Ég vil gera gagn og ég trúi á hugmyndafræði og gildi jafnaðarmanna. Ég vil taka þátt í að byggja upp samfélag þar sem öllum getur liðið vel. Samfélag þar sem rétt er gefið.

Ég vil að á Íslandi sé öflugt velferðarkerfi að norrænni fyrirmynd. Lífeyrisþegar eiga að geta lifað góðu lífi og fólk á ekki að þurfa að fara á hausinn þótt það veikist. Ég vil jöfn tækifæri fyrir alla, óháð efnahag og uppruna. Ég vil að unga fólkið okkar sjái góða framtíð fyrir sér hér á landi en svo er ekki nú. Ég vil alvöru gjaldmiðil, sanngjörn lánakjör, efnahagslegan stöðugleika og fjölbreytt atvinnutækifæri. Ég vil búa í litríku, fjölmenningarlegu samfélagi. Við eigum að taka þeim sem hér vilja búa og taka þátt í samfélaginu okkar fagnandi. Og ég vil að við munum að við eigum bara eitt, einstakt Ísland. Það er okkar að tryggja að komandi kynslóðir geti notið þess sem sama hætti og við gerum nú.

Óskalistinn minn er rándýr. Þá kemur sér vel að við erum einmitt rík þjóð sem á gnægt auðlinda sem því miður hafa ekki nýst okkur öllum heldur bara örfáum. Stóra verkefnið er að stöðva ránið mikla og fá arðinn af auðlindum þjóðarinnar inn í samneysluna svo við getum boðið fólkinu í landinu upp á eins góð lífsskilyrði og frekast er kostur. Aðeins þannig getum við stöðvað landflótta unga fólksins og spekilekann. Við gætum breytt fiskveiðistjórnunarkerfinu, farið að rukka þá sem selja ferðamönnum landið okkar eða þá sem nýta orkuna. Eða við gætum innleitt nýja stjórnarská sem tryggir að auðlindir þjóðarinnar séu sameiginleg og ævarandi eign hennar og að aðeins megi framselja þær til skamms tíma, gegn fullu gjaldi. Og það er það sem ég vil umfram allt gera.

Við í suðvesturkjördæmi höfum rétt rúmlega hálft atkvæði í samanburði við þá sem búa hinum megin við Hvalfjarðargöngin. Mestu áhrifin höfum við þegar okkur býðst að taka þátt í flokksvali sem þessu. Þess vegna vil ég hvetja þig, lesandi góður, til að taka þátt. Okkar er valið og hvert atkvæði skiptir máli. Og kannski þarf hugrekki til að breyta ásýnd flokksins og rífa hann upp á nýjan leik. Ég vil taka þátt í því.

Ef þú vilt vita meira um mig bendi ég þér á vefinn minn www.margrettryggva.is eða fésbókarsíðuna www.facebook.com/MargretTry/.

 

Flokkun : Efst á baugi
0,424