Hófsemi
Ríkisútvarpið skýrði frá því í morgunfréttum (26.09.´18) að stéttarfélagið Framsýn vilji “að lágmarkslaun verði 375.000 krónur á mánuði fyrir fullt starf.“ Þetta er kaupkrafan fyrir kjaraviðræðurnar framundan”. Félagið vill að samið verði um “krónutöluhækkanir, styttingu vinnuvikunnar og að 80 prósent vaktavinna teljist sem fullt starf,“ segir og í fréttinni.
Mynd: (c) Sigurður Örn Brynjólfsson
Unnið hefur verið að kröfugerðinni undanfarna mánuði. Á vef stéttarfélagsins segir að hún sé innlegg í sameiginlega kröfugerð Starfsgreinasambands Íslands og Landssambands íslenskra verslunarmanna. Við undirbúning kröfugerðarinnar voru gerðar kannanir meðal félagsmanna, vinnustaðir heimsóttir og tveir félagsfundir haldnir, annar á íslensku og hinn á ensku.
Í kröfugerðinni segir að skattbyrði hafi aukist mest hjá lágtekjufólki og að því sé eðlilegt að krefjast þess að ríkisstjórnin komi til móts við þann hóp með skattkerfisbreytingum. Skoða þurfi þann möguleika að fjölga skattþrepum eða hækka persónuafslátt fólks á lágmarkslaunum.
Það sem af er árinu hafa flestar, ef ekki allar fréttir um væntanlega kjarasamninga snúist um að gerð þeirra verði bæði löng og erfið, að framundan séu heiftarleg átök og verkföll vegna kröfuhörku verkalýðshreyfingarinnar. Þessi fyrsta frétt um kröfur hennar segir aðra sögu og bendir til þess að hægt sé að semja hratt og vel og án verkfalla, því þetta eru sanngirnis kröfur; þetta eru hófsemdar kröfur.
- Sálumessa - 02/07/2020
- Umhverfisvændi - 21/04/2020
- Er brennivínið besti kostur? - 26/03/2020
