Hofmóður

Ég er ekki í stjórnarandstöðu. En ég játa það, áður en langra er haldið, að ég hef lengi haft ímigust á stjórnmálaferli Kristjáns Þórs Júlíussonar, sjávarútvegsráðherra. Sá illi bifur jókst mjög þann tíma sem hann svaf í embætti heilbrigðisráðherra á sama tíma og heilbrigðiskerfið morknaði vegna viljandi vanrækslu hans.

Og hann minnkaði ekki ímigusturinn þegar hann, fyrrverandi eitt og annað tengt stærsta útgerðarfélagi landsins og peningalegur ölmusuþegi þess, varð sjávarútvegsráðherra. Í báðum embættum hefur hann ávallt mætt gagnrýni með yfirlæti. Og gerir það enn, þessi þjónn okkar.

Þann tíma sem hann hefur setið í sjávarútvegsráðuneytinu hefur það versta varðandi sjávarútveg fengið að malla áfram og vaxa eins og sjá má í greininni Að éta sjálfan sig, og birt var á Herðubreið 21.11 ´19. En hann lætur sem hann hvorki sjá né heyri gagnrýni. Gorgeirinn hefur kæft í honum þá siðsem sem ætla má að hver og einn fái í vöggugjöf. Þessu til sönnunar er þetta, tekið orðrétt upp úr visi.is rétt í þessu:

„Það er hins vegar uppi núna raddir í pólitíkinni sem eru allt annars eðlis og hafa í raun ekkert með stjórnsýsluna að gera heldur eru fyrst og fremst pólitík. Við heyrum það frá stjórnarandstöðunni til dæmis sem ræðir þetta af miklum móð, það er fyrst og fremst pólitík. Það er ekkert nýtt varðandi hæfi mitt tengdu Samherja frá árinu 2017 frá því ég gaf þess yfirlýsingu. Ég spyr hvar hafa þessar raddir verið allan þann tíma. Það er ekkert nýtt í málinu, ekki nokkur skapaður hlutur,“ sagði Kristján Þór.

Sum sagt. Samherji, stærsta útgerðarfélag landsins, helsti styrktaraðili ráðherrans, er bendlaður við alþjóðlegt svínarí. En ráðherrann á Samherjastyrk situr sem fastast sem yfirmaður sjávarútvegsins í landinu og segir í hofmóði: Það er ekkert nýtt í málinu, ekki nokkur skapaður hlutur!