Framliðnir færast enn í aukana: Afi heitinn benti á rúmlega fjörutíu milljónir

Allir helstu fjölmiðlar landsins sögðu þá frétt í gær að framliðinn afi konu á höfuðborgarsvæðinu hefði bent henni á hvernig hún gæti orðið rúmlega fjörutíu milljónum króna ríkari.

Konan hefði að sögn unnið í Lottóinu, rúmlega áttatíu milljónir króna, en fengi ekki nema helming vinningsfjárhæðarinnar nema hún fyndi annan vinningsmiða með sömu tölum, sem hún hefði glatað.

Að sögn starfsmanna Íslenskrar getspár var konan í uppnámi, en spurði afa sinn heitinn – þar sem hún var við akstur í bíl sínum á heimleið – hvar týndi miðinn væri og fékk rétt svar.

Hana hafði nokkru áður dreymt að hún ætti skuldlaust húsnæði.

Konan hrasaði líka, að sögn Íslenskrar getspár, rétt áður en hún keypti seinni miðann og var það almennt talið góðs viti.

Þessa frétt birtu allir fjölmiðlar í gær í ýmsum tilbrigðum.

Ríkisútvarpið vitnaði í frásögn starfsmanna Lottósins án þess að geta þess hvaðan þau væru komin.

Morgunblaðið sagði sömu sögu með þessum upphafsorðum: „Stundum er raunveruleikinn ótrúlegri en nokkur lygasaga.“

Vísir lýsti handanleiðslunni svo, en gat heimilda:

„Nú voru góð ráð dýr. Hún var á heimleið til að snúa öllu við þegar hún spurði afa sinn heitinn hvar miðinn væri. Og það stóð ekki á svari. Hún lagði bílnum og kíkti undir sætið þar sem miðinn beið.“

DV birti tilkynningu fyrirtækisins Íslenskrar getspár orðrétta og athugasemdalaust, meðal annars með þessari setningu: „Draumurinn verður að veruleika, ótrúlegir hlutir gerast.“