Foreigner vinnur Miles Davis örugglega

Íslendingar þurfa ekki að hafa áhyggjur af úrslitum í leiknum við Argentínu á heimsmeistaramótinu í fótbolta.

Um þetta eru sérfræðingar Herðubreiðar sammála og hafa aldrei áður verið svo samhljóða í spám sínum. Ísland á sigurinn vísan að mati allra nema eins.

Bragi Valdimar Skúlason:

„Ég tel, vona og veit að Íslendingar munu sigra í þessari orrustu með allnokkrum yfirburðum, eða fjórum mörkum gegn engu. Enda þekki ég alla íslensku drengina með nafni en kann engin deili á þessum bláröndóttu argintrítlum.“

Svanborg Sigmarsdóttir er á öðru máli:

„Argentína spilaði síðast í enska sjónvarpinu mínu á HM ´98. Nú skyldi Falklandseyja og handar Guðs hefnt. Sigurvíman frá ´66 yrði allsráðandi. Ég var hins vegar of upptekin við góða bók til að fylgjast með. Í gegnum hlátursekka yfir lýsingum á reiðmönnum heimsendisins og óargadýri Helvítis heyrði ég öðru hvoru ragn og bölv. Hefndin kæmi síðar. Eins mun fara fyrir víkingunum, þó ég viti ekki hvaða harma þeir eiga að hefna.“

Þess ber að geta að Svanborg þykir allajafna ekki hafa mikið vit á fótbolta.

Guðmundur Steingrímsson hefur það hins vegar – smá:

„Ég finn mikla truflun í mættinum, svo ég vitni í Star Wars. Messi er mikill töframaður. Ég giska á að Ísland–Messi fari 1-1 og að þjóðin muni ekki taka þau úrslit almennilega inn fyrr en á þriðudag, miðvikudag. Fram að því verðum við öll mjög undrandi í framan, en brosandi.“

Þessi úrslit eru vitaskuld sigur fyrir Íslendinga og skemmst er að minnast þess þegar þeir höfðu sigur á Portúgal 1-1.

Svanhildur Hólm Valsdóttir er líka með allt á hreinu:

„Ah, Ísland–Argentína. Þessi leikur sem hefur fært útskriftir, brúðkaup og jarðarfarir, jafnvel frestað dauðsföllum. Og svo er maður bara spurður: Hvernig heldurðu að leikurinn fari? Ég get alveg reynt að rýna í tölfræði, velta fyrir mér styrkleikastigum og verðmæti hvors liðs fyrir sig, en það hefur nákvæmlega ekkert upp á sig. Okkur langar einfaldlega meira til að vinna. Og sigur er hugarástand. Þess vegna segi ég að við vinnum þennan leik, 1-1.“

Logi Már Einarsson veit hvernig er að snúa tapi í sigur og hann hefur meiraðsegja talsvert vit á fótbolta:

„Ég hrífst af hæfilega skipulögðum liðum þar sem einstaklingsframtakið fær að njóta sín til hins ítrasta. Leikmenn taka áhættu og leyfist að impróvisera. Svolítið eins og góð djasshljómsveit. Ég hef minna gaman af ofur skipulögðum leikstíl, þar sem flest er njörvað niður og lítið þol fyrir hinu óvænta – svolítið eins og iðnaðarrokk áttunda áratugarins. Ég átta mig þó á að það er klókt að sníða sér stakk eftir vexti og hef því fullan skilning á áferð íslenska liðsins. Eitt af því sem gerir fótbolta hins vegar svo ómætstæðilegan er að allt getur gerst, þrátt fyrir mikinn styrkleikamun liða. Ég vona því að hið mjög svo óvænta gerist og Foreigner vinni Miles Davis Quintet á laugardaginn, 1-0.“

Að öllu samanlögðu tekur því varla að spila þennan leik heldur skrifa strax þrjú stig á Ísland.