Enn er okrað á mjólkurvörum: Hækkun um 275% á meðan almennt verðlag hækkar um 67%

Verð á Smjörva hefur hækkað um 275 prósent á rúmlega áratug á meðan vísitala verðlags hefur hækkað um 67 prósent.

Þetta er meðal þess sem lesa má úr verðsamanburði sem DV birtir í dag.

Þar er borin saman matarkarfa í Bónus á árunum 2007, 2012 og 2018.

Verðlagsbreytingar eru mjög mismiklar eftir vöruflokkum og má eflaust rekja flestar þeirra til gengis krónunnar.

Athygli vekur þó áberandi verðhækkun á mjólkurvörum, þar sem næstum allur kostnaður við framleiðsluna er þó innlendur og veltur því minnst á gengisbreytingum.

Hér eru dæmi úr frétt DV:

500 grömm af MS skyri kostuðu 99 krónur árið 2007. Þau kosta nú 240 krónur. Það er hækkun upp á 242 prósent.

Einn lítri af MS léttmjólk kostaði 72 krónur árið 2007, en kostar nú 152. Sú hækkun er 211 prósent.

Dós af Smjörva kostaði 147 krónur árið 2007. Núna kostar hún 549 krónur. Að teknu tilliti til magnbreytingar (dósin er núna 400 grömm, var 300) er verðhækkunin 275 prósent.

Lesendur geta kynnt sér önnur dæmi í fréttinni, svo sem um matreiðslurjóma frá MS sem hefur hækkað um 218 prósent.

Á vef Hagstofunnar má svo sjá að vísitala neysluverðs – almennt verðlag í landinu – hefur á sama tímabili hækkað um 67 prósent.