Engar áhyggjur, Bjarni minn

Meðal þess sem leynist í Panamaskjölunum eru afrit af samtölum Bjarna Benediktssonar við föður sinn. Hér eru einungis tilfærð tvö dæmi:

——

(2001)

BB: „Vá, flott hús pabbi!“

BS: „Já, þetta verður ágætt fyrir okkur á veturna. Stutt í golf og sona.“

BB: „Eigum við það?“

BS: „Jájá, við eigum það. Við mamma þín keyptum það.“

(BB hugsar: Þá erfi ég það einn góðan veðurdag. Hér eru líka allir dagar góðir veðurdagar.)

BB (upphátt): „Hvar fenguð þið peninginn?“

BS: „Hafðu ekki áhyggjur af því, Bjarni minn. Farðu bara út að leika þér.“

——

(2011)

BB: „Pabbi? Þú manst að ég þurfti að láta gera við loftkælinguna?“

BS: „Já?“

BB: „Héddna, sko. Reikningurinn kom áðan. Hann er stílaður á Greenlight Holding SA. Hvað er það?“

BS: „Það er bara eitthvað gamalt.“

BB: „Gamalt hvað?“

BS: „Bara eitthvað gamalt frá okkur mömmu þinni.“

BB: „Hvað meinarðu? Er þetta ekki eitthvað sem ég ætti að vita af? Ég er nú einu sinni formaður Sjálfstæðisflokksins og verð kannski forsætisráðherra.“

BS: „Neinei, þú þarft ekkert að hugsa um það. En er ekki betra að þú verðir fjármálaráðherra? Þú veist, einkavæðingin, skattarnir og svona. Það kæmi sér óneitanlega betur.“

BB: „En pabbi. Lendi ég í einhverjum vandræðum út af þessu?“

Bs: „Við lendum aldrei í vandræðum, það er eitt af lögmálum lífsins. Hafðu ekki áhyggjur, Bjarni minn. Farðu bara á Ashley Madison að leika þér.“