Árni Þór sótti um stöðu hjá Norðurlandaráði fyrir kosningar 2013. Leyndi félaga sína umsókninni

Árni Þór Sigurðsson, alþingismaður þangað til í gær og sendiherra frá næstu áramótum, sóttist eftir því að verða framkvæmdastjóri Norðurlandaráðs vorið 2013.

Í bréfi sem Árni sendi félögum í Vinstri grænum í gær rekur hann aðdraganda þess að hann verður nú sendiherra. Þar segir:

„Snemma á þessu ári kom til álita að ég færi til starfa hjá Öryggis- og samvinnustofnun Evrópu, ÖSE. Í hæfnisferli sem slíkar alþjóðastofnanir gera, var ég metinn mjög vel hæfur til að gegna ábyrgðarstarfi og það hvatti mig áfram og færði mér einnig heim sanninn um að ég gæti gert gagn á sviði utanríkis- og alþjóðamála. Það er aðdragandi þess að ég fer nú til starfa í utanríkisráðuneytinu.“

Ennfremur segir í bréfinu: „Þessi staða var ekki fyrir hendi þegar ég gaf kost á mér í forvali flokksins fyrir síðustu alþingiskosningar og fékk góðan stuðning félaganna.“

Árni Þór lætur hjá líða að nefna, að hann sótti um stöðu framkvæmdastjóra Norðulandaráðs vorið 2013. Þá var forvali Vinstri grænna í Reykjavík lokið, búið að samþykkja framboðslista og þingkosningar framundan.

Samkvæmt traustum heimildum Herðubreiðar var félögum Árna Þórs innan VG ekki kunnugt um þessa atvinnuumsókn fyrr en eftir kosningar. Hann sótti hins vegar fast að verða formaður þingflokks VG að kosningum loknum.

Ýmsir innan VG hafa lýst vanþóknun á þeirri ákvörðun Árna Þórs að gerast sendiherra um leið og Geir H. Haarde, þar á meðal varaformaður flokksins, Björn Valur Gíslason, í grein í dag.

Hin sænska Britt Brohlin fékk starfið, sem Árni Þór sóttist eftir, og tók við því í júlíbyrjun 2013.