Allsleysi

 

Á Bessastöðum er því þráfaldlega haldið fram að Ísland sé best í heimi og Íslendingar eftir því. Það er líka gert annars staðar innan Framsóknarflokksins svo sem í stjórnarráðinu við Lækjartorg. Það er því ekki að undra að þeir sem þarna ráfa um og rausa skuli ekki hafa brugðist við fréttum um fátækt á Íslandi. Nýbirt könnun hefur leitt í ljós að 6000 Íslendingar, karlar, konur og börn, eru ekki bara fátæk heldur sárafátæk. Allslaus. Þetta eru ömurlegur sannleiki.

Það kann að vera að ég hafi heyrt ráðherra segja að það eigi að skipa rýnihóp, starfshóp, nefnd eða einhvern flokk til þess að kanna fátæktina og greina hana. Ef ekki biðst ég afsökunar á því að nefna þetta því að það er ljóst að örbirgð verður ekki upprætt með vinnuhópi. Og ekki heldur með því einu að hreyta peningum í þá snauðu.

Það er vitað hvaða fólk þetta er þó að fátækt fólk trani sér ekki fram til þess að ræða um örbyrgð sína því að það er niðurbrotið. Það skammast sín. Það felur sig.

Sé vilji til þess að vinna bug á eymdinni þarf að gera það með því að fara til hinna allslausu, vinna með þeim að lausn vandans, styrkja þá andlega og félagslega og styðja þá til sjálfbjargar. Það er hægt. Það ber að gera það. Strax. Annað er smánarlegt af vellauðugri þjóð.

Eftirskrift:

Í þessu sambandi er rétt að minn á að íslenskir skattaþjófar eiga hundruðir miljarða í Paradís sem ríkisstjórnin getur komið höndum yfir hvenær sem er ef hún vill og þorir.