Tilkynning til borgaryfirvalda

Hér með tilkynnist borgaryfirvöldum að veturinn er búinn og því er þeim alveg óhætt að sópa upp öllum þeim ógrinni af sandi sem dreift var á stíga borgarinnar í vetur.

Ég veit að þetta var mikið magn og gríðarleg fjárfesting en leyfi mér að benda á að hún nýtist ekki í því veðurfari sem nú er og virkar reyndar þveröfugt í bleytu. Blautur sandur á stígum borgarinnar er eins og hálka fyrir hjólreiðamenn.

Það er gott að búa í Kópavogi eins og einhver sagði og það er langt síðan maður fór að rumska eldsnemma við niðinn í sópbílunum sem fóru af stað um fjögurleytið á morgnanna. Sú tíð er þó löngu liðin því búið var að sópa alla stíga í Kópavogi fyrir páska (það mætti samt fara að sópa í Hlíðargarðinum og á fleiri stöðum þar sem tækin komast ekki). Nú vöknum við í Reynihvamminum bara við lóuna, sólina og gaggið í hænum nágrannans. Allt eins og það á að vera.

Þar til maður hjólar í vinnuna. Um leið og komið er yfir til Reykjavíkur mæta manni sandhraukar á stígum og gangstéttum og ef vind hreyfir þarf að hjóla í gegnum sandrok sem er ekki þægilegt.

Ef Reykjavík ætlar að standa undir nafni sem hjólaborg (og það ætla ég sannarlega að vona) þá verður hún að standa sig, ekki bara í sandburði heldur líka í að sópa sandinum upp á vorin. Nú þegar mánuður er í kosningar verður þetta að teljast ótrúlega lélegt.