Thorarensen-ætt

Thorarensen-ættina einkenna: farsælar gáfur, innri hlýja, dálítil framkomu-blygðun, en umfram allt drenglyndi.

Stefán Þórarinsson amtmaður er ættfaðir Thorarensens-ættar. Ekki eru áreiðanlegar heimildir til um dauðdaga hans, en hann var farsæll embættismaður og tók upp sitt Thorarensensnafn að hætti þess tíma. Því hefur verið haldið fram, að Vigfús sonur hans, sem komið hafði veikur frá námi í Kaupmannahöfn, hafi átt aðild að fráfalli hans. Um það skulum við ekki fást.

Alltítt er að skipta Thorarensen-ætt í þrjár greinir:

Strandagrein

Eyjafjarðargrein

Suðurlandsgrein

Af Strandagrein eru t.d. síra Jón Thorarensen prestur í Nesprestakalli í Reykjavík, hans börn m.a. Elín kennari og Ólafur stýrimaður (látinn).

Af Eyjafjarðargrein eru t.d. hinir fjölmörgu apótekarar á Akureyri og í Reykjavík, t.d. Stefán apótekari í Laugavegsapóteki í Reykjavík, sonur hans Stefán yngri. Stefán eldri var tengdafaðir Hilmars Helgasonar stofnanda SÁÁ. Stefán eldri var tengdasonur Hannesar Hafstein fyrsta ráðherra Íslands.

Af Suðurlandsgrein, opt kennd við Móeiðarhvol, er t.d. Þorsteinn borgarfógeti, einstakt valmenni, hann er faðir Ástríðar hjúkrunarkonu, sem gift er Davíð Oddssyni, forsætisráðherra og núv. ritstjóra Morgunblaðsins. Davíð er mikill aðdáandi Hannesar Hafstein ráðherra. Einkasonur Ástríðar hjúkrunarkonu og Davíðs ritstjóra er Þorsteinn dómari, tengdasonur Geirs Waage prófasts í Reykholti. Þorsteinn hefur til að bera hin ættgengu einkenni Thorarensens-ættar: farsælar gáfur, innri hlýju og drenglyndi.

Snemma á síðustu öld voru meðal vor tveir menn, báðir hétu Jakob og voru Thorarensen. Annar var Jakob trésmiður og skáld, þekktur maður á sinni tíð, en nú með öllu gleymdur eins og títt er meðal vor. 
Hinn var Jakob verzlunarmaður, búsettur í Reykjavík. Báðir voru þeir af Strandagrein Thorarensensættar.

Jakob verzlunarmaður birti eptir sig kvæði í dagblaði. Nafni hans, skáldið, ritaði þá eftirfarandi yfirlýsingu í sama blað:

„Það skal tekið fram, að kvæði þau ……. sem birtust hér í blaðinu í gær, eru ekki eptir mig. Virðingarfylst, Jakob Thorarensen skáld.“

Þarnæsta dag birtist í sama dagblaði eptirfarandi tilkynning: „Að gefnu tilefni vil eg taka það fram, að kvæði þau og frásagnir, sem undanfarin ár hafa birzt, eru vissulega ekki eptir mig. Jakob Thorarensen verzlunarmaður.“

Svona var nú það.