Sigríður Ingibjörg kom Samfylkingunni til bjargar

Eftir Ómar S. Harðarson

Sigríður Ingibjörg Ingadóttir hefur fengið á sig harða gagnrýni úr horni stuðningsmanna Árna Páls Árnasonar fyrir það að hafa gefið kost á sér sem formaður Samfylkingarinnar á nýliðnum landsfundi flokksins. Sumt af þeirri gagnrýni kemur ekki á óvart, en allir sem hafa tjáð sig um framboðið vaða í miklum villum. Framboðið var alls ekki „misráðið“ né „aðför“ að sitjandi formanni. Þvert á móti var framboðið það besta sem gat komið fyrir flokkinn á þessum tímapunkti. Það sem meira er: Formennska Árna Páls er tryggari nú en ef ekki hefði komið til framboðs Sigríðar Ingibjargar.

Það vill svo til að á landsfundi Samfylkingarinnar árið 2013, þeim hinum sama og lýst var kjöri Árna Páls sem formanns flokksins, var eftirfarandi grein bætt við í lög flokksins:

6.02 Fari ekki fram atkvæðagreiðsla um formannskjör samkvæmt gr. 6.01 skal formaður kjörinn á landsfundi til tveggja ára í senn, sbr. 6.04, og skulu þá allir félagar 18 ára og eldri vera í kjöri hverju sinni og kjörgengir. Kosning skal fara fram þótt aðeins einn hafi gefið kost á sér.

Árni Páll hefði því aldrei orðið sjálfkjörinn, þótt einn hefði verið í framboði. Formannskosning hefði farið fram föstudaginn 20. mars, jafnvel þótt Sigríður Ingibjörg hefði setið á sér.

Nú er erfitt að vita hvernig formannskosning hefði farið með Árna Pál einan í framboði. Sagan er sjaldan sögð í þáskildagatíð. Líklegast er þó að mun færri hefðu greitt atkvæði – það var jú fyrirfram búið að dæma þennan landsfund sem daufan og óspennandi. Þá er alls ekki víst að Árni Páll hefði fengið meirihluta þeirra atkvæða sem þó hefðu verið greidd. Margir voru óánægðir með störf hans og hefðu annað tveggja, skilað auðu eða skrifað inn nafn einhvers annars.

Við slíkar niðurstöður hefði staða flokksins og formannsins orðið öllu verri en nú er. Daufur landsfundur, Árni Páll í vandræðum í kosningabaráttu við auðu atkvæðin og óvíst með öllu að hann ætti sér framtíð í stjórnmálum.

Þegar valkostirnir eru skoðaðir, er því ljóst að framboð Sigríðar Ingibjargar varð Samfylkingunni til mikils framdráttar. Þá skiptir engu máli hvað gamlir hundar gjamma úr hornum.

Höfundur var fulltrúi á landsfundi Samfylkingarinnar 20015