Sigmundur á einum skó

Nú þegar komin er upp fordæmalaus staða finnst mér rétt að benda á eitt atriði.  Ég er ekki viss um að fólk almennt átti sig á hvernig það virkar þegar forsætisráðherra er ekki formaður flokks og formaður stjórnarflokks ekki heldur ráðherra. Við höfum ekki sérlega góða reynslu af því.

Í stað þess að forsætisráðherra t.d. semji um þinglok við formenn annarra flokka f.h. þingflokksins (þannig á það allavega að virka) þá er það formaðurinn. Þegar Jóhanna Sigurðardóttir kláraði kjörtímabilið án þess að vera formaður Samfylkingarinnar virtist hún missa öll völd. Árni Páll Árnason varð talsmaður flokksins og t.d. sló nýju stjórnarskrána út af borðinu í útvarpsviðtali án nokkurs samráðs við þingflokkinn.

Nú er ég ekki sérlega hrifin af foringjaræði og leiðtogadýrkun. Hins vegar er nauðsynlegt að menn hafi skýrt umboð til þeirra verka sem þeim hafa verið falin. Hugsanlega gæti þetta fyrirkomulag virkað með formann sem væri ofur diplómatískur. Það er SDG ekki og það ætti öllum að vera ljóst.

Sigmundur Davíð Gunnlaugsson segist nú ætla að stíga út úr ríkissjórninni. Hann virðist samt ætla að skilja annan skóinn sinn eftir inn. Spurninginn er bara hvort það sé íþróttaskór eða blankskór.