Segðu af þér Vigdís!
Í kvöldfréttum RÚV í gær var frétt um það ófremdarástand sem tómur túlkasjóður Samskiptamiðstöðvar heyrnarlausa veldur. Að mínu mati fela smánarlega lágar fjárveitingar til sjóðsins í sér gróf mannréttindabrot því undanfarin misseri hefur sjóðurinn ítrekað tæmst og þeir sem þurfa á túlkun að halda hafa mátt bíða vikum og mánuðum saman eftir nýrri fjárveitingu. Í fréttum hefur komið fram að hver og einn sem þarf á túlkun að halda getur leitað til sjóðsins átta til tíu sinnum á ári. Við sem lifum í raunveruleikanum skiljum að það er alltof lítið. Reyndar fáránlega lítið.
Í fréttinni var talað við Vigdísi Hauksdóttur, formann fjárlaganefndar Alþingis. Eins og glöggir áhorfendur tóku eftir (og jafnvel aðrir líka) talaði hún tóma steypu. Hennar skýring á fjárhagsvanda sjóðsins var að Katrín Jakobsdóttir, fyrrverandi menntamálaráðherra hefði hækkað laun túlka um helming, úr 5.000.- krónur í 10.000.- og því tæmist sjóðurinn fyrr.
Ef maður hækkar eitthvað sem kostar 5.000.- um helming gerir það 7.500.- en ekki 10.000. Mikilvægt er að sá sem vinnur með upphæðir og tölur, eins og formaður fjárlaganefndar, skilji svona lagað. Það er þó ekki aðalatriði málsins.
Stóra málið, það sem veldur því að útilokað er að Vigdísi flatmagi enn í embætti er að hún sagði hvorki satt né rétt frá og reyndi að kenna öðrum um. Allir sem hafa verið á leikskóla vita að slíkt er bannað.
Fjárlög eru ákvörðuð eitt ár í senn. Fjármálaráðherra leggur fram fjárlagafrumvarp þegar þing kemur saman að hausti og eftir fyrstu umræðu af þremur gengur málið til fjárlaganefndar sem fer yfir hvern einasta lið með aðstoð fagnefnda þingsins, talar við forsvarsmenn stofananna og færir til fjármagn eftir því sem þurfa þykir, og ekki síst: eftir pólitískri forgangsröðun meirihlutans. Fjárveitingavaldið er nefnilega hjá Alþingi. Og fjármagni er úthlutað eitt ár í senn. Hér má sjá feril síðustu fjárlaga fyrir árið 2015. Það að túlkasjóðurinn sé tómur nú í júní árið 2015 getur ekki með nokkru móti verið fyrri ríkisstjórn að kenna. Það klúður og sú mannfyrirlitning sem í því fellst skrifast algjörlega og eingöngu á núverandi stjórnvöld, ráðherra menntamála Illuga Gunnarsson og sitjandi þing. Það ber formaður fjárlaganefndar, Vigdís Hauksdóttir, mesta ábyrgð enda er það hún sem tekur málið inn í þingið aftur, ber fram breytingartillögur meirihlutans, mælir fyrir þeim og rökstyður. Hún er kjörin af Alþingi til þessara verka og sú ábyrgð er mikil. Með fáránlegum útskýringum sínum hefur hún brugðist trausti þingsins og slíkur umkenningaleikur er þinginu ekki samboðinn.
Í tíufréttinum var önnur frétt um málið. Rætt var við Valgerði Stefánsdóttur, forstöðumaður Samskiptamiðstöðvar heyrnarlausra sem segir ummæli Vigdísar alröng, laun túlka séu alveg óbreytt:
„Það sem er rétt er að gjaldskrá fyrir túlkaþjónustu hækkaði úr tæpum sjö þúsund krónum í tæpar tíu þúsund krónur í tíð síðustu ríkisstjórnar. Það er annað en þau laun sem túlkarnir fá,“ segir Valgerður.
Við getum ekki haft manneskju eins og Vigdísi Hauksdóttur í jafnmikilvægu embætti og formaður fjárlaganefndar er. Hún ber ekki virðingu fyrir grundvallarmannréttindum, lýgur og reynir að koma eigin sök á pólitíska andstæðinga. Hún verður að víkja.
- Baráttan um Ísland - 27/10/2017
- Hvaða máli skiptir ný stjórnarskrá? - 23/10/2017
- Forsetinn veitir undanþágur frá lögum … - 20/10/2017
