Ókeypis ráðgjöf til stjórnvalda

Nú hefur komið í ljós að stofnanir og ráðuneyti hafa varið milljónum í almannatengslaráðgjöf. Miðað við hve erfitt hefur reynst fjölmiðlum að ná tali á þeim sem ráðgjöfina þáðu og í hvaða stöðu þeir eru núna, leyfi ég mér að efast um að þetta hafi verið góð ráðgjöf og peninganna virði.

Í Fréttablaðinu í dag er að finna prýðilega ráðgjöf sem gæti bæði sparað skattgreiðendum milljónir og gert líf okkar allra á þessu skeri miklu betra og þægilegra. Það er nefnilega hvorki gaman né þolandi fyrir almenna borgara að þurfa að afplána mál eins og lekamálið mánuð eftir mánuð og verða vitni af því þegar stjórnmálamenn og embættismenn fara alltaf lengra og lengra út á gráa svæðið.

Í dálknum „Frá degi til dags“ stendur:

Segið satt og skilmerkilega frá. Ekki forðast fjölmiðla. Veitið aðgang að gögnum. Talið hreint út.

Þessi ráð kosta ekkert og eru í boði blaðamannsins Kolbeins Óttarssonar Proppé.