Leiðbeinandi tilskipun forsætisráðuneytisins um liti

1. gr. Með leiðbeinandi tilskipun þessari skal útlit alls á Íslandi fært til samræmis við hugmyndir forsætisráðherra um það hvernig allt á Íslandi skuli vera. Litir eru þar ekki undanskildir.
2. gr. Íslendingar skulu almennt vera fölir yfirlitum. Þó er hægt að veita undantekningu frá þessari grein sé heitið hollustu við hinn hvíta Krist.
3. gr. Gras skal vera grænt.
4. gr. Grjót skal að mestu leyti vera grátt og svæðum sem bera aðra liti, skal sökkt eins fljótt og auðið er.
5. gr. Vatn skal vera blátt þegar heiður er himinn og sól á lofti. Annars skal það vera grátt ellegar gegnsætt.
6. gr. Þjóðfáni landsins skal vera blár með hvítum og rauðum krossi.
7. gr. Byggingar skulu að utan ekki vera málaðar öðrum litum en þeim sem notaðir voru 1. desember 1918. Veggir þurfa að vera hvítir, svartir eða fölgrænir og óheimilit að nota nema tvo liti á hverja byggingu.
8. gr. Þök skulu vera svört ellegar græn. Torfþök mega þó vera gulleit frá september til maí.
9. gr. Að innan skulu byggingar málaðar með hvítri, ljósgrárri, fölgrænni ellegar ljósblárri málningu. Ekkert herbergi skal vera tvílitt.
10. gr. Girðingar skulu vera grænar að lit. Þó má tjarga þær, teljist slíkt nauðsynlegt vegna veðráttu.
11. gr. Skip skal mála svört ellegar grá og yfirbyggingu þeirra hvíta ellegar okkurgula. Möstur skulu vera máluð til samræmis við lit yfirbyggingar skipa.
12. gr. Sjálfrennireiðar skulu vera gráar, hvítar eða svartar og aka um á svörtum togleðurshringjum.
13. gr. Flugvélar skulu málast hvítar og hlífðargleraugu flugmanna og farþega vera brún að lit.
14. gr. Tilveran skal vera grá.
15. gr. Leiðbeinandi tilskipun þessi tekur gildi 1. desember 1918 2018.
16. gr. Við gildistöku tilskipunarinnar, fellur brott orðið leiðbeinandi.