Karolina Fund

 

Til er sniðugt fyrirbrigði sem heitir Karolina Fund og er íslensk hópfjármögnunarvefsíða. Hópfjármögnun er kannski framandi fyrirbrigði í augum margra enda tiltölulega ný leið til að fjármagna verkefni, viðburði og nýsköpun. Karolina Fund hefur þó verið í loftinu síðan 2012 og fjármagnað fjölda verkefna, t.d. sirkústjaldið Jöklu. Erlendis hafa síður á borð við Kickstarter verið vinsælar meðal frumkvöðla (og annarra hugmyndaríkra einstaklinga líka svo sem dæmin sanna) og með þeim hafa tugþúsundir sniðugra verkefna fengið gott brautargengi með hópfjármögnun.

Oft kostar töluvert fé að koma góðum hugmyndum í framkvæmd og það getur verið bæði erfitt og áhættusamt fyrir einstaklinga að fjármagna verkefnin sín á eigin spýtur. Þar kemur hópfjármögnun sterk inn því hún byggir á því að í stað þess að fáir leggi til eða láni mikið fé leggi margir til eitthvað smáræði sem hver og einn treystir sér til að vera án, oft gegn einhverri umbun. Enginn ætti að þurfa að hafa áhyggjur af því að fjármagnið sem hann leggur til renni ekki beint í verkefnið því sá sem fyrir því stendur gerir samning við greiðslumiðlun (kortafyrirtæki/Borgun) og ef markmið fjármögnunarinnar nást ekki er engin greiðsla tekin af korti viðkomandi.

Þegar ég hef átt lausa stund síðustu misserin hef ég verið að skrifa. Ég hef reyndar alltaf verið sískrifandi svo það er ekkert nýtt. Það er nefnilega þannig sem mér finnst best að kryfja málin til mergjar og skilja þau til fulls. Fyrir rúmu ári lauk setu minni á Alþingi. Þá leið mér eins og ég væri nýsloppin úr sjávarháska sem hefði staðið meira og minna í fjögur ár og mér fannst ég þurfa að gera þennan tíma upp, bæði fyrir sjálfan mig og fyrir fólkið í kringum mig sem stóð í þessu með mér og studdi mig, hvernig sem viðraði. Þess vegna ákvað ég að skrifa um þessa lífsreynslu.

Í fjögur ár var ég í vinnu fyrir íslenska skattgreiðendur og mér finnst mikilvægt að þeir hafi aðgang að þessari sögu og því vil ég gefa hana út. Það kostar hins vegar haug af peningum að gefa út bók. Þar kemur Karolina Fund til bjargar. Í dag hóf ég hópfjármögnun á síðunni þar sem ég býð öllum sem vilja að taka þátt í að fjármagna prentun og útgáfu á bókinni. Nánari upplýsingar eru á vefsíðu verkefnisins á Karolina Fund.