Frjálst er í Framsalsdal

Kvótakerfið sló í dag þrjú byggðarlög í gólfið.  Með einu höggi. Útgerðarfélagið Vísir tilkynnti að framvegis ætli það að vinna allan sinn fisk í Grindavík en loka starfsstöðvum á Djúpavogi, Húsavík og á Þingeyri.

Þetta er ekki í fyrsta skipti sem nákvæmlega þessi frétt (bara með öðrum staðarheitum og annarri útgerð) heyrist og örugglega ekki í síðasta skipti heldur. Alla vega ekki á meðan auðlindin í sjónum er í eigu þingmanns Framsóknarflokksins (sem einmitt situr á þingi fyrir Vísi) og annarra klíkubræðra í LÍÚ.

Hvað getum við gert? Getum við varpað þessu fjárans kerfi af okkur, eða að minnsta kosti þeim hluta þess sem tryggir nokkrum útgerðarmönnum eignarréttinn á auðlindinni? Eða er þessi þjóð of barin til að þora að taka afstöðu með sjálfri sér gegn stórlöxunum í landinu?

Að lokum mæli ég með því að sjómenn marseri á Austurvöll og sýni útgerðinni og kvótakerfinu stuðning í verki.