Aukavinna ráðherra

Á vefsíðunni Hringbraut er athyglisverð frétt. Þar segir meðal annars:

Menntamálaráðherra fór í lok mars í opinbera vinnuferð til Kína á kostnað ríkisins með hóp embættismanna og annarra. Með í för voru fulltrúar frá fyrirtækinu Orka Energy sem vinnur að orkutengdum verkefnum í Asíu. Það sem ekki hefur komið fram opinberlega er að ráðherrann er á launum hjá Orka Energy sem ráðgjafi. Það kemur skýrt fram á vef Alþingis þar sem fjallað er um fjárhagslega hagsmuni og trúnaðarstörf utan þings. Á vefnum er að finna svar Illuga Gunnarssonar við spurningunni “Starfsemi sem unnin er samhliða starfi alþingismanns og er tekjumyndandi fyrir hann eða félag sem hann á sjálfur eða er meðeigandi í.” Þar segir orðrétt: „Ráðgjafastörf fyrir Orka Energy Singapore. Um er að ræða ráðgjöf vegna verkefna fyrirtækisins í Asíu.”

Ég veit ekki með ykkur en mér finnst þetta út í hött – það er nóg slæmt að ráðherra vinni ráðgjafastörf fyrir einkafyrirtæki þótt hann nýti ekki opinberar heimsóknir, kostaðar af skattgreiðendum til að ganga erinda þeirra. Þetta er eitthvað sem stjórnskipunar- og eftirlitsnefnd Alþingis þarf að spyrja ráðherrann nánar út í, ætli hún að standa undir nafni.

Í tillögum stjórnlagaráðs að nýrri stjórnarskrá er grein sem tekur á slíkum hagsmunaárekstrum. Það er greinilega ekki vanþörf á henni þegar ráðherrar búa við skerðingar á siðferðissviðinu:

88. gr. Hagsmunaskráning og opinber störf

Ráðherra er óheimilt að hafa með höndum önnur launuð störf á meðan hann gegnir embætti. Sama gildir um störf í þágu einkafyrirtækja og opinberra stofnana þótt ólaunuð séu.

Í lögum skal kveðið á um skyldu ráðherra til að veita upplýsingar um fjárhagslega hagsmuni sína.

Skjáskot af vef Orku Energy.