Allt um fyrirhugaða mosku
Vinkona mín Ólöf Guðný Valdimarsdóttir arkitekt setti inn eftirfarandi upplýsingar á fésbókinni og mynd af deiliskipulaginu. Það er merkilegt að í öllu havaríinu sem hin ósmekklegu og óbilgjörnu ummæli oddvita Framsóknar í Reykjavík ollu að enginn fjölmiðill hafi birt nákvæmlega hvernig þetta er hugsað. Ég get ekki ímyndað mér að nokkrum stafi hætta af eins til tveggja hæða húsi á umferðareyju en það er greinilega hægt að gera allt tortryggilegt ef viljinn er fyrir hendi. En gefum Ólöfu orðið:
Úthlutun á lóð til félags Múslima á Íslandi, undir mosku, var samþykkt í borgarráði þann 19. september 2013. Lóðin er ein þriggja nýrra lóða, S1, S2 og S3 sem skipulagðar voru á grænu svæði við Suðurlandsbraut.Þann 30. ágúst 2013 tók gildi breyting á deiliskipulagi sem nefnt er Sogamýri, svæði sem liggur milli Suðurlandsbrautar og Miklubrautar næst Elliðaánum. Deiliskipulagsbreytingin gerir ráð fyrir að breyta grænu svæði með trjágróðri í miðsvæði. Samhliða deiliskipulagsbreytingunni var gerð tilsvarandi breyting á aðalskipulagi Reykjavíkur. Þétting byggðar er höfð að leiðarljósi við skipulag svæðisins í samræmi við markmið í endurskoðun gildandi aðalskipulags eins og segir í markmiðssetningu skipulagsbreytinganna.Deiliskipulagið gerir ráð fyrir þremur nýjum lóðum á svæðinu þar sem fyrst og fremst er gert ráð fyrir verslunar- og þjónustustarfsemi, stjórnsýslu og skrifstofum. Minnsta lóðin er 1350 fm þar sem byggja má rúmlega 600 fm og síðan eru tvær 1600 fm lóðir sitt hvorum megin þar sem byggja má allt að 800 fm á hvorri lóð. Byggingar mega vera 1-2 hæðir og er hámarksvegghæð 8,5 m og hámarksþakhæð 9,5 m. Heimilt er að vera með litla turnbyggingu 5-10 m á stærri lóðunum tveimur en grunnflötur turnbygginga má ekki vera meiri en 20 fm.
Bindandi byggingarlína er meðfram Suðurlandsbraut og skal 70% langhliðar byggingar snerta þá línu. Form bygginga er frjálst innan byggingarreits, en byggingarlist skal vera í háum gæðaflokki og falla vel að umhverfi svæðisins.
- Baráttan um Ísland - 27/10/2017
- Hvaða máli skiptir ný stjórnarskrá? - 23/10/2017
- Forsetinn veitir undanþágur frá lögum … - 20/10/2017
