Arnaldur Sigurðarson 11/09/2014

Virðingarskylda fyrir Alþingi

Alþingi hefur nú störf á ný eftir allt of langt sumarfrí. Venju samkvæmt mun það koma saman í þeirri snobbsamkomu sem er ganga þingmanna í kirkju. Í því ljósi er þess vert að ræða aðeins fyrirbærið sem er virðing fyrir Alþingi. Það heyrist oft að fólki beri að bera virðingu fyrir Alþingi. Sumum þykir sjálfsagt að mikilvægt sé að bera virðingu fyrir Alþingi, þessari elstu lýðræðisstofnun heims eins og sumir Íslendingar vilja ranglega monta sig af. En hvað er það nákvæmlega sem Alþingi hefur gert til þess að verðskulda þessa virðingu? Það getur vel verið að Alþingi hafi um tíma átt skilið slíka virðingu, en það hefur þá verið löngu áður en ég byrjaði að fylgjast með íslenskum stjórnmálum.

Staðreyndin er sú að Alþingi sem stofnun hefur verið siðferðislega gjaldþrota frá því vel fyrir hrunið 2008. Þetta er stofnun þar sem hefðir virðast skipta meira máli en það að þjóna almenningi. Áhersla er lögð á að fólk komi virðulega fram, karlarnir skulu klæðast fínum jakkafötum og helst ætti það að vera regla að vera með bindi ef sumir fengju að ráða. Á sama tíma er til fólk eins og námsmenn, öryrkjar, atvinnulausir og fleiri sem þurfa að velja á milli þess að endurnýja gatslitnu og margbættu gallabuxurnar sínar og að hafa nóg til að borða út mánuðinn.

Talandi um virðingu og gallabuxur: hvað er það eiginlega sem er ekki nógu virðingarvert við gallabuxur? Ef eitthvað er þá ættu gallabuxur að vera hæsta tákn virðingar í vestrænum lýðræðisríkjum. Gallabuxur hafa lengi verið staðlaður fatnaður fyrir hinn venjulega verkamann. Gallabuxur voru dýrasta smyglvara sem hægt var að finna á svarta markaðinum í Sovétríkjunum. Gallabuxur ættu að vera tákn fyrir sigur lýðræðisins gegn fasisma. En nei, þær eru ekki nógu góðar fyrir jakkafataklæddu mennina, jakkafötin sem kosta svo háar upphæðir að hinn almenni borgari þarf að spara í marga mánuði til þess að geta klætt sig svona virðulega.

Mér hefur ávallt fundist hugmyndin um að það sé skylda að bera virðingu fyrir einhverju mjög vafasöm. En hvernig ætti Alþingi þá að fara að því að endurheimta virðinguna sem sumum finnst svo sjálfsögð? Það væri góð byrjun að sjá meiri auðmýkt á meðal þingmanna. Ég get aðeins nefnt eitt dæmi sem ég man eftir þar sem þingmenn hafa beðist afsökunar fyrir mistök sem þeir gerðu í starfi. Mistökin hafa verið mun fleiri. Virðingarleysið gagnvart þjóðinni hefur verið mun meira. Vanhæfni hefur átt sér stað mun oftar. Það væri líka gaman að sjá þingmenn klæða sig eins og venjulegt fólk, ekki eins og snobbuð elíta yfirstéttarinnar. Svo væri það líka fínt að sjá þingið taka það alvarlega og hlusta þegar stórir hópar fólks taka sig saman og mótmæla aðgerðum þingsins á Austurvelli. Margir þingmenn virðast nefnilega gleyma því að Alþingi starfar fyrir fólkið, ekki öfugt.

Arnaldur Sigurðarson
Latest posts by Arnaldur Sigurðarson (see all)
Flokkun : Pistlar
1,709