Verjast þarf flótta með bættum kjörum

Baráttan um Ísland snýst ekki um landsbyggðina vs. höfuðborgarsvæðið. Það sést svo greinilega þessa dagana. Þeir sem hafa menntun sem auðveldlega nýtist erlendis eru í allt annari stöðu en við hin. Þau geta bara farið þegar þeim lystir eða þegar þannig árar.

Og þótt marga lysti að vera hér, eða koma heim að námi loknu, þá árar bara ekki þannig að það sé skynsamlegt. Því miður. Hvað sem líður lágri verðbólgu undanfarna mánuði og aukningu á hagvexti sem er reyndar drifinn áfram af einkaneyslu, sem mun leiða til halla á vöruskiptunum og gengisfellingar krónunnar og verri stöðu eftir nokkra mánuði eða misseri. En það er önnur saga.

Sem sé þrátt fyrir þetta þá árar í raun illa. Af hverju? Jú af því að það skortir alla raunverulega framtíðarsýn. Hvað ætla menn að gera? Hvað vilja menn gera? Til að bæta ástandið til frambúðar, til að gera Ísland lífvænlegt, ekki bara fyrir okkur sem getum ekki annað en verið hér, heldur líka fyrir þau hin sem geta farið annað.

Baráttan er nefnilega ekki um landsbyggðina eða höfuðborgarsvæðið. Fólk fer úr landi og nú miðað við algert ráðleysis stjórnvalda varðandi stöðu lækna og alls heilbrigðiskerfisins sjá menn enga framtíð. Það rís ekki nýr spítali á næstunni, ríkið mun ekki koma sterkar inn og bjarga heilbrigðiskerfinu, nei laun lækna munu ekki hækka en það mun hinsvegar kostnaðarþátttaka almennings gera. Það er því ekki bjart yfir þessum málaflokki. Og það þýðir bara eitt, landflótti stéttanna í heilbrigðisgeiranum mun halda áfram.

Það bætir svo ekki stöðuna sífelldar uppákomur með að flytja störf út á land. Einsog það sé einhverskonar lausn. Á hverju spyr ég? Bætir það stofnanirnar, mun það breyta einhverju á landsbyggðinni? Hugsanlega, en fyrir hvaða kostnað?

Því ef menn ætla að flytja störf út á land sem krefjast menntunar, að ekki sé talað um sérmenntunar sem nýta má í útlöndum, þá einfaldlega verður til enn ein ástæða fyrir fólk til að flytja út. Er það ekki freistandi fyrir einhverja að fara burt af skerinu í stað þess að vera neyddur út á land. Ef maður vill t.d. ekki búa út á landi. Fara frekar þangað sem kaupið er hærra, vextirnir eru lægri, matarverðið er lægra og þar sem maður getur keypt alvöru fetaost og parmesean líka. Er það ekki líklegra?

Þessi barátta núverandi stjórnvalda fyrir einhverskonar nauðungarflutningum á fólki út á land er byggð á algerum misskilningi og sýnir að menn eru ekki að skoða heildarmyndina, og eru fastir í gömlum kreddum, arfagömlum.

Við þurfum að koma okkur inn í nútímann og það sem fyrst. Því annars sitjum við ein hér eftir á skerinum sem getum ekki annað, aðrir fara.

En það má ekki horfa á hlutina í samhengi. Hvað gagnast það okkur að lækka skatta á kvótagreifa og auðmenn? En hækka kostnaðinn í heilbrigðiskerfinu og hækka matarverðið með vaskhækkun? Hvernig eykur það vilja fólks til að búa á Íslandi, og þess vegna úti á landi?

Hvað er hægt að gera til að bæta kjörin, styrkja innviði Íslands og fá unga menntaða fólkið heim?

Það blasir svolítið við, en það má ekki tala um það. Af því að hin ráðlausa ríkisstjórn hinna ríku segir það.

Við megum ekki komast að því hvað í raun felst í aðild að Evrópusambandinu og við megum alls ekki komast að því hvað muni nú gerast ef við leggjum upp í þá vegferð að kasta krónunni fyrir evruna.