Úlfar Þormóðsson 28/05/2014

VARÚÐ!

Maður fékk miljón króna lán í viðskiptabankanum sínum og gekk þannig frá því að hann mætti borga inn á höfuðstólinn hvenær sem hann vildi. Mánuði síðan greiddi hann 100 þúsund krónur inn á höfuðstólinn með það fyrir augum að lækka vaxtakostnað sinn. Höfuðstóllinn lækkaði ekki. Hann hringdi í bankann en fékk engin skiljanleg svör. Þá fór hann á staðinn, reyndar þrisvar sinnum, þar til hann fékk það svar að innborgunin hefði verið lögð inn á söfnunarreikning. „Það er hentugast þannig“, sagði bankinn. Og þannig er það; höfuðstóllinn lækkar ekki þrátt fyrir samning um að þannig skuli það vera, en upp sprettur söfnunarreikningur sem aldrei var beðið um.Peningar

Það er verið að fremja bókhaldsbrellur í bankanum.

Maður á áttræðisaldri svaraði í símann heima hjá sér. Það var bankinn hans sem hringdi. Hann vildi veita honum kostakjör. „Þú átt reikning sem gefur 3,7% vexti“, sagði bankinn. „Við viljum bjóða þér allt að 5,9% vexti ef þú flytur innistæðuna yfir á bundinn reikning. Og ef þú …“ Þarna hætti maðurinn að hlusta, minnugur þess að með þessu móti höfðu bankarnir læst klónum í kunningja hans sem átti allan sinn lífeyri inni á einhverjum „sérlega vernduðum ofurvaxtareikningi“ þegar Gamla-Bóla sprakk.

Bankarnir eru að búa til Nýju-Bólu með þrautreyndum aðferðum.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
2,019