Úlfar Þormóðsson 08/12/2014

Þrenna

 

Sigmundur Davíð er með sömu einkenni og Ólafur Ragnar; stokkbólginn af sjálfsáliti telur hann sig vera meiri en hann er. Vegna þess sem hér fer á eftir er rétt að minna á að hann er fyrsti þingmaður norðausturkjördæmis með lögheimili á eyðibýli. Ekki kóngur í höll.

Gottrúp sýslumaður og fjölskylda

 

Stundum heimsækir Sigmundur kjördæmið. Einhvern tíma í kringum mitt ár fór hann norður, hitti frammara á Akureyri sem áttu stórt húsnæði sem þeim tókst ekki að leigja út. Þá greip hann kóngsáráttan. Hann tók húsnæði flokksbræðranna á leigu fyrir ríki sitt, hringdi í þjón sinni, sjávarútvegsráðherrann, og fól honum að tilkynna að Fiskistofa skyldi flutt norður. Og starfsmennirnir með. Nauðugir viljugir.

Á miðju sumri fór Sigmundur aftur norður. Hann leit við á Húsavík og sá þegar af skarpskyggni sinni að þar vantaði hvalabein Án samráðs við nokkurn sem málið viðkom sendi hann frá sér tilskipun um að hvalabein, sem ákveðið hafði verið að sett yrðu upp í Perlunni í fyllingu tímans, skyldu flutt norður og sett saman þar.

Vegna leka settist Sigmundur í dómsmálaráðuneytið. Nokkrum klukkustundum áður en hann yfirgæfi það fékk hann konungskast. Hann hafði tekið eftir því að starfsmenn ráðuneytisins voru að vinna að því að sýslumaður Sunnlendinga hefði lögsögu á Hornafirði. Þetta líkaði honum ekki og ákvað í konunglegum anda, að höfðu samráði við fyrsta þingmann norðausturkjördæmis, að lögreglumál Hornafirðinga skyldu flutt úr suðurkjördæmi í norðausturkjördæmi.

Á fótboltamáli heitir þetta að skora þrennu og þykir merkilegt afrek. Hitt er þó merkilegra að mörkin í þrennunni virðast ætla að flokkast sem sjálfsmörk. Það er merkilegast við þetta. Trúlega einsdæmi.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
0,822