trusted online casino malaysia
Úlfar Þormóðsson 13/12/2014

Háflug

 

Margur var farinn að halda að framsóknarmenn væru algjör letiblóð; formaður þingflokksins nennir ekki að halda lífi í Ríkisútvarpinu og forsætisráðherra og formaður flokksins nennir ekki að sitja þingfundi. En þetta er bara alls ekki rétt. Lítið á þetta:

sigmundur davíð

Í maí síðast liðnum skipaði forsætisráðherra fimm manna nefnd, Landshlutanefnd fyrir Norðurland vestra. Þetta er einskonar hugarflugsnefnd. Formaður hennar er Stefán Vagn Stefánsson, oddviti Framsóknarflokksins í Skagafirði. Með henni starfar Ásmundur Einar Daðason, þingmaður Framsóknarflokksins í Norðvesturkjördæmi og aðstoðarmaður forsætisráðherra auk launaðs starfsmanns í umboði forsætisráðherra.  Nefndin vann og vann, hugsaði og hugsaði og tókst á hálfu ári að ná utan um hugmyndir sínar, setja þær niður á blað og senda foringjanum. Hann hreifst svo af tillögunum að hann kallaði ríkisstjórnina saman þegar í stað og kynnti henni hugmyndirnar.

Af snjallráðunum hópsins ber fyrst að nefna að honum þykir tilvalið að flytja Rafmagnsveitur ríkisins (Rarik) norður á Sauðárkrók, byggja upp Gagnaveituna á Blönduósi og færa rekstur skipa Landhelgisgæslunnar yfir í Skagafjörð. Þar er ein góð höfn. Hún er á Sauðárkróki. Að vísu er smáhöfn á Hofsósi og leifar af hafnarmannvirkjum í Haganesvík. Kannski er hugmyndin að hressa upp á aðra þeirra og mylgra einhverjum aurum í tiltækið. Það fylgir fyrstu fréttum af þessu stórkostlega andlega afreki að framkvæmdirnar muni kosta nokkur hundruð miljóna. En af nógu er að taka eins og landsmenn vita.

Ríkisútvarpið sem ríkisstjórnin ætlar að kirkja í greip sinni skýrði frá þessu í fréttum klukkan sex og reyndi að ná í ráðherra til þess að spyrja þá út í þessa hugljómun. Þeir vildu ekki tala um málið. Sjónvarpið reyndi fyrir útsendingu sjö frétta en enginn þeirra gaf sig.

Það verður ljósara með hverjum deginum sem líður að landinu er stjórnað af mannvitsbrekkum sem í hugljóman brjóta stoðir samfélagsins í mél, stefna að því að maska ríkisstofnanir og flytja fólk nauðungaflutningum á milli landshluta. Af þeim sökum er tilefni til að snúa út úr Guttavísum Stefáns Jónssonar, almáttugur enn sú gæfa að eiga svona börn.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
1,293