G. Pétur Matthíasson 11/04/2016

Það er eitthvað verulega mikið að…

….og það eru bara mótmælin á Austurvelli sem geta lagað það sem er að. Eða komið okkur til að taka fyrsta skrefið á endurbót númer tvö eftir hrun. Afhverju er ekki gengið hreint til verks og kosið strax? Nú heyrist frá fjármálaráðherra að hann hyggist jafnvel leggja fram fjárlagafrumvarp og svo verði kosið í október.

Halló!!? Er ekki í lagi heima hjá fólki? Hvernig skyldi nú slíkt fjárlagafrumvarp líta út. Eina spurning er hversu mikið af allskyns loforðum yrði í því. Loforðum um vegabætur hér og þar, nýjar brýr, ný göng. Loforð um flugvelli, um nýjan spítala (loksins), um meiri peninga í heilbrigðismálin, menntamálin og bara allt það sem gæti skilað atkvæðum til stjórnarflokkanna. Síðan væri málið einfaldlega lagt þannig upp að ef fólk ekki kysi sömu stjórn þá myndi ekkert að loforðunum ganga eftir. Og Bjarni Ben með pálmann í höndunum, annað hvort yrði hann kosinn áfram í ríkisstjórn ellegar gæti hann barið á ríkisstjórn sem kosið yrði og sakað hana um að svíkja öll loforðin (hans eigin loforð). Það er svo augljóst að svona bull gengur ekki upp.

Fjárlagafrumvarp á að vera unnið af stjórn sem mun sitja áfram og þarf að díla við ríkisfjármálin í fjögur ár. Ekki svona æfingar takk.

Þetta sýnir raunverulega best að það er ekki eftir neinu að bíða, menn verða að drífa í kosningum og koma á stjórn til framtíðar, eða næstu fjögurra ára. Það þarf nýtt umboð. Kirkjugarðarnir eru fullir af fólki sem hélt það væri ómissandi. Það er enginn ómissandi við það að ljúka afnámi gjaldeyrishafta, enda menn sammála um þá leið sem er farin, grunnurinn að henn var enda lagður í tíð síðustu ríkisstjórnar.

Nei, kosningar eru eina leiðin. Eina leiðin til að koma þeim á er að mæta á Austurvöll, og þótt það hafi ekki verið margir í dag, ekki ef miðað er við síðasta laugardag, hvað þá mánudaginn sem þjóðin getur verið stolt af. Mánudeginum 4. apríl. Hann er að nokkru okkar Bastilludagur. Viva la Islande!

Það er búið að gefa rauða spjaldið og nú þarf leikmaðurinn að víkja af velli. Ef hann sér það ekki þá mun hann halda áfram að gera Íslandi ógagn. Það er komið nóg af háðung. Það varð orðstír okkar til bjargar að rákum einn út af fyrir viku, en það bara dugir ekki til. Mætum sem mest og sem oftast, og það er alveg í lagi þótt ekki komi allir alltaf, og það verður margt á laugardaginn.

PS: Þótt ekki séu tugþúsundir, þá eru þau hundruð og þúsund manns allavega, ekki láta neinn segja ykkur annað, myndirnar sýna það.

 

Flokkun : Pistlar
0,795