Spellvirkjar
Það eru sjálfsagt ærið margir sem furða sig á því hversvegna hlutirnir ganga fyrir sig með þeim hætti sem þeir gera. Húsnæði Landsspítalans er látið grotna niður, nauðsynleg lyf eru ekki alltaf tiltæk þegar þörf er á og starfsfólk sjúkrahúsanna er útkeyrt og svo láglaunað að það flýr land til þess að geta stundað þau störf sem það er menntað til að gegna. Þeim sem ekki eru enn flúnir er haldið í verkfalli vikum og mánuðum saman.
Menntakerfið er vanrækt. Skólar eru fjársveltir. Þeir eiga í erfiðleikum með að nútímavæða starfið og helst illa á kennurum.
Ferðamannaiðnaðinum er fyrir löngu orðinn öflug atvinnugrein. Fólk þyrpist hingað til þess að skoða óspillta náttúru og fagurt land og borgar miðjarða fyrir í erlendum gjaldeyri. Stjórnvöld skilja þetta ekki og hafa uppi áform um að malbika hálendið, virkja árnar á einstæðum flúðum og drekkja fögrum vinjum með uppistöðulónum.
Og nú hefur enn eitt stjórnunarundrið verið opinberað. Náttúrupassinn. Það á að selja aðgang að fegurðinni. Og það eru ekki bara þeir sem koma utanlands frá til þess að njóta hennar sem eiga að borga. Við sem erum fædd inn í hana, og eigum enn heima í henni, skulum líka greiða fyrir aðgang að Þingvöllum, Gullfossi og Geysi. Og fróðlegt verður að sjá hvernig farið verður með Mývetninga sem búsettir eru í einni mestu náttúruperlu landsins, hvort þeir þurfi að kaupa sig inn í sveitina í hvert sinn sem þeir koma heim til sín úr öðrum byggðum.
Allt framantalið er gert vegna þess að við erum svo blönk. Segja ráðherrarnir. Það er ósatt. Þeir hafa margsinnis sagt okkur frá því að það sé svo mikið til af peningum í landinu að það sé engin ástæða til þess að innheimta auðlegðarskatt. Sömu ósannindamenn ákváðu að aflétta þúsundum miljóna skattgreiðslu af útgerðinni sem mokar inn peningum. Um áramót á að fella niður sykurskatt fyrir styrktaraðila stjórnarflokkanna, Nóa-Síríus og Mjólkursamsöluna. Stjórnin dregur mánuðum saman að kaupa lista með nöfnum mörg hundruð skattsvikara sem stolið hafa undan og geyma fé í Paradís. Þar bíða tugir miljarða, ef ekki hundruðir, eftir því að verða sóttir og færðir heim.
Hvers vegna er þetta svona?
Það er blekking að þykjast ekki vita ástæðuna fyrir þessu. Afneitun. Svo mikil afneitun, að það telst oflátungsbragur að birta svarið. Samt blasir það við: Þetta er sjálfsskaparvíti. Í almennum kosningum kusu landsmenn svo marga fáfræðinga á þing að þeim tókst að mynda ríkisstjórn sem er löngu orðin vanhæf fyrir margra hluta sakir. Þar situr fólk með takmarkaða þekkingu á almannahag, lítinn velvilja og litla vitneskju um hvað eru máttarstoðir eins samfélags. Fólk sem á erfitt með að greina satt frá lognu. Þingmeirihlutinn er skipaður ánum. Í ríkisstjórn sitja spellvirkjar.
